Жер бетіндегі барлық бала жасы мен жынысына, әлеуметтік-тұрмыстық және басқа да жағдайларға қарамастан, бақытты болуға лайықты. Біз, ересектер, олардың болашағы жарқын, бүгіні қауіпсіз, өткені әдемі естеліктерге толы болуы үшін барымызды салуымыз керек.
Осы ретте 1 маусым — Халықаралық балаларды қорғау күніне орай облыстық камералық оркестр ұжымы кішкентай көрермендерге бірқатар сый-сияпат дайындап қойды.
Солардың алғашқысы — бүгін қаламыздағы «Шапағат» арнаулы әлеуметтік қызмет көрсету орталығында ұйымдастырылған мерекелік кеш. Аталған ұйымға арнайы барып, ерекше қамқорлықты қажет ететін балалардың көңілін көтеріп, әдемі әсер мен мерекелік көңіл күй сыйлап қайттық.
Кішкентайларға арналған сыйымыз мұнымен бітпейді. Ертең, 1 маусым күні камералық оркестр ұжымы Көшімдегі арнаулы мекемеге концерттік бағдарлама қояды. Кешкі сағат 19.00-де қалалық саябақта саз бен сән үйлесім тапқан шара өтеді. Камералық оркестр ұжымы мен облыстық дизайнерлер қауымдастығы құрамындағы жергілікті дизайнерлер бірлесіп ұйымдастырған шарада балаларға арналған заманауи сәнді киімдер топтамасы таныстырылады. Оркестр көпшілікке белгілі мультфильмдердің саундтректерін көрерменге сыйға тартпақ.
Салтанат АБУЛГАЗИЕВА,
БҚО камералық оркестрінің директоры
zhaikpress.kz
