Орал қаласындағы №1 емханада 1 желтоқсан – Дүниежүзілік ЖИТС-ке қарсы күрес күніне орай «Теңдік уақыты» атты конференция өтті. Дөңгелек үстелде медицина саласының мамандары бүгінде барлық өңірде аталған ауруға қарсы ақпараттық күрес белсенді жүріп жатқанын мәлімдеді.
Алғаш сөз кезегін алған облыстық ЖИТС-тің алдын алу және оған қарсы күрес жөніндегі орталық директорының міндетін атқарушы Алмагүл Мантакова аталған күнге орай медициналық ұйымдарда «Ашық есік» күндері, түрлі профилак-тикалық іс-шаралар жоспарланғанын айтты.
– Облысымызда 21 қараша мен 1 желтоқсан аралығында дүниежүзілік ЖИТС-пен күрес күніне арналған онкүндік өтуде. Білім беру жүйесінде семинарлар, тренингтер, концерттік бағдарламалар, халық арасында сауалнама және ерікті экспресс тестілеу, сондай-ақ сауда, ойын-сауық кешендерінде ауқымды акциялар, кино көрсетілімдер ұйымдастырылуда, – деді Алмагүл Ақжұманқызы.
Айта кетейік, денсаулық сақтау саласы бойынша ең алғашқы халықаралық деңгейдегі атаулы күн – 1988 жылы ЖИТС-ке қарсы дүниежүзілік күрес күні болып белгіленді. Қазіргі уақытта БҰҰ агенттіктері, мемлекеттер және азаматтық қоғам жыл сайын АИТВ-ға қатысты мәселелерге арналған науқанды өткізуде.
Аталған орталықтың эпидемиологиялық бөлімінің меңгерушісі Аяжан Аслямованың айтуынша, бүгінгі таңда облысымызда АИТВ жұқтырған 973 адам анықталды. Оның 66,4%-ы – ер адамдар болса, 33,6%-ы – әйелдер. АИТВ-ны жыныстық жолмен – 48,6%, ал есірткіні қолдану барысында – 4 5,3%, гомосексуалдық жолмен жұқтырғандар 2,5%-ды құрайды. Облыс тұрғындары арасында АИТВ инфекциясының таралуы 40-49 жаста – 17,1%, 50-59 жаста – 5,8%, 60-69 жас аралығында – 2,8%. АИТВ/ЖИТС жұқтырғандардың 20-39 жас аралығындағы көрсеткіші – 69,8,%.
– Иммун тапшылығы инфекциялық сипаттағы басқа аурулардың өршуіне негіз болады. Медицина дамуының қазіргі кезеңінде бұл ауруды толық емдей алады деп айта алмаймыз. Иммун тапшылығы вирусы адам ағзасында 10-12 жыл бойы өмір сүретін жағдай да кездеседі. Тұрғындардың көбі аурудың бастапқы белгіле-ріне назар аудармайды. Содан ЖИТС-тің аса қауіпті екеніне мән бермейді. Егер емдеу үдерісі уақытында басталмаса, кейін аурудың алдын алу мүмкін болмайды. Уақытында әрекетке көшсек, тиімді емдеу іс-шараларын жасай аламыз деген үміт те жоқ емес, – деді №1 емхананың емдеу-алдын алу бөлімінің терапевт-дәрігері Майра Сағынғалиева.
Аманжол Исламғали,
zhaikpress.kz
