«Су - тіршілік көзі» десек, ауданымызда қос өзеннің бойында қоныс тепкен елді мекендер үшін судың маңызы зор. Әсіресе, Сарыөзен жағасында орналасқан Қоныс, Бостандық, Көктерек, Жұлдыз ауылдарының халқы «Ақбұлақ» бағдарламасы арқылы таза ауыз сумен қамтылған. Өзен суының деңгейі ауыз суды тазалайтын қондырғылардың жұмысына тікелей әсер етеді. Жоғарыдан келетін судың деңгейін қалыпты ұстап тұру үшін өзен бойында бөгеттер мен қақпалар орнатылған. Судағы гидротехникалық нысандардың жұмысына «Қазсушар» мекемесі тікелей жауапты. Мекеме қызметкерлері Ресейден келетін суды реттеп, төмендегі елге де су жіберуде.
Жуырда Қарасу ауылдық округіне қарасты Жұлдыз ауылында орналасқан Шәкен бөгетін су шәйіп кету қаупі төніп, өзен суын реттейтін тұрбалар қозғалған. Бір сөзбен айтқанда «Апатты жағдай» орын алуға аз қалған. Мәселені дер кезінде байқаған Қарасу ауылдық округінің әкімі Асхат Нұржанов тез арада аудан әкімдігіне, аудандық төтенше жағдайлар бөліміне, «Қазсушар» мекемесіне хабар береді. Нәтижесінде Казталов ауданы әкімі тарапынан шұғыл шешімдер қабылданып, орын алған мәселені шешу жұмыстары басталады.
Облыстық «Қазсушар» мекемесінің қолдауымен Шәкен бөгетінің басына аудандық коммуналдық шаруашылық кәсіпорнының техникалары жеткізілген. Бүгінде бөгетті қалпына келтіру жұмыстары жүруде. Уақытында шешім қабылданып, қалпына келтіру жұмыстары жүріп, өзендегі судың деңгейі түсіп кеткен жоқ. Су төмен ағып кеткен жағдайда жоғарыдағы ауылдар ауыз сусыз қалар еді.
Атқарылып жатқан жұмыстарды өз көзімізбен көру үшін аудан әкімінің орынбасары Ғаділбек Әлібекұлымен бірге Жұлдыз ауылына барып қайттық.
Бөгет басында округ әкімі Асхат Нұржанов, «Қазсушар» мекемесінің біздің өңірдегі инженер-гидротехнигі Еркебұлан Ермуқанов жұмыс барысын ұйымдастырып жүр. Округ әкімін сөзге тарттық.
— Өзіңіз көріп тұрғандай, Сарөзендегі суды реттеп ұстайтын Шәкен бөгетін су шәйіп кету қаупі төнді. Мәселені шұғыл түрде назарына алған аудан әкімі Рүстем Мүлкайұлына, бөгетті қалпына келтіріп жатқан «Қазсушар» мекемесінің өкілдеріне, аудандық коммуналдық кәсіпорын қызметкерлеріне округ тұрғындары атынан алғыс білдіремін!- деп ағынан жарылды Асхат Нұржанов.
Расында, мәселені уақытында байқап, жұмыстарды дер кезінде ұйымдастырған атқамінер азаматтардың бұл игі ісі көпке үлгі.
Қайрат Жақып,
Казталов ауданы
