Бүгін мәдени-демалыс орталығында Кеңес әскерінің Ауған елінен шығарылғанына 34 жыл толуына орай «Елім деп соққан жүректерге ән толады» атты аудандық әскери-патриоттық әндер байқауы өтті.
Ән байқауында өнер көрсететін үміткерлер: Көпжасар ауылдық округінен Алпамыс Сыдиқов, Мәстексайдан Есенғали Ибатов, Жаңақаладан Жанболат Мұсағалиев, Жаңажолдан Жалғас Ибатуллин, Бірліктен Нұрдәулет Табылдиев, Жаңақазаннан Нұрсәт Болатов пен Қажмұхан Құмашұлы.
Аталмыш байқауға аудандық мәдениет, тілдерді дамыту, дене шынықтыру және спорт бөлімінің басшысы Данял Танзенов, мәдени-демалыс орталығының музыка өңдеушісі, үздік мәдениет қызметкері Саясат Бексариев, алғашқы әскери және технологиялық дайындық пәні мұғалімі, аудандық «Ән салады мамандар» байқауының лауреаты Эрнест Мұсаев төрелік етіп, әділқазылар алқасының қатарынан табылды. І кезеңде үміткерлер Ауған соғысы жайында әндерді, ІІ кезеңде Туған жерге арналған патриоттық әсем әндерді шырқап, көрермен қошеметіне бөленді.
Байқау нәтижесінде Нұрсәт Болатов пен Қажмұхан Құмашұлы ІІІ дәрежелі дипломмен марапатталса, Жанболат Мұсағалиевке ІІ дәрежелі диплом табысталды. І дәрежелі дипломмен Нұрдәулет Табылдиев марапатталды. Қалған үміткерлерге алғыс хаттар табысталды.
Райхан Амантайқызы
