GCIP-Kazakhstan елдік жобасы іске қосылды. Бұл туралы ҚР Экология және табиғи ресурстар министрлігі хабарлады. GCIP-Kazakhstan жобасының негізгі мақсаты - инновацияларды ілгерілету, шағын және орта бизнес жобаларын, Қазақстанда Жасыл жұмыс орындарын құру үшін жасыл технологиялар саласындағы стартаптарды қолдау. Грант Қазақстанға Біріккен Ұлттар Ұйымының өнеркәсіптік даму жөніндегі ұйымының (ЮНИДО) көмегімен Жаһандық экологиялық қормен бөлінген.
Іс-шараға ҚР Экология және табиғи ресурстар министрлігі, «Qazinnovations» инновацияларды дамыту жөніндегі ұлттық агенттігі» АҚ, Tumar Venture Fund, «Ғылым қоры» АҚ, сондай-ақ ЮНИДО, The network for Global Innovation (АҚШ) және т. б. сияқты бірқатар халықаралық ұйымдардың өкілдері қатысты. Кездесу барысында жобаның кезеңдері, оны іске асыру жоспарлары, сондай-ақ GCIP-Kazakhstan жобаларын іріктеу критерийлері таныстырылды.
Іс-шараны құттықтау сөзімен ашқан ҚР Экология және табиғи ресурстар вице – министрі Досбол Бекмағамбетов ,Қазақстан үшін, GCIP-ге қосылған Орталық Азиядағы бірінші мемлекет ретінде, таза технологияларды дамытудың тиімді инновациялық экожүйесін құруда бірегей мүмкіндік екенін атап өтті. Оның айтуынша, жоба жаңа инновациялық шешімдер жасауға, технологиялардың тиімді трансферіне ықпал етуге, жұмыс орындарын құруды қоса алғанда, қосымша әлеуметтік-экономикалық пайданы қамтамасыз етуге, сондай-ақ Қазақстанға шетелдік нарықтармен ынтымақтастық желісін нығайтуға мүмкіндік береді.
Айта кету керек, бағдарламаның ұлттық орындаушысы болып Халықаралық жасыл технологиялар және инвестициялық жобалар орталығы анықталды.
«Қазақстанның инновациялық және кадрлық әлеуеті бар екенін атап өту қажет, алайда жасыл технологияларды коммерцияландыру үшін түрлі кедергілер бар. Біздің Орталық жобаны тиімді іске асыру үшін барлық жағдай жасайды және инновацияларды дамыту, таза технологиялар саласындағы технологиялық кәсіпкерлікті қолдау арқылы экономиканы «жасылдандыру» саласындағы міндеттерді шешуге ұмтылатын болады», - деді «Халықаралық жасыл технологиялар және инвестициялық жобалар орталығы» КЕАҚ Басқарма төрағасы Олжас Ағабеков.
GCIP тәсілдері стартаптарды алдын ала таңдауды, акселерацияны және коммерцияландыруды қамтиды. Бұл ең перспективалы кәсіпкерлерді анықтау және оларды үнемі тәлімгерлік ету, олардың инновациялық идеялары мен тұжырымдамаларын ұлттық және жаһандық нарықтарға шығуға дайын толыққанды өнімдер мен қызметтерге айналдыру үшін оқыту арқылы қолдау үшін жүзеге асырылады.
Акселерация-бұл 3 айдан 6 айға дейінгі бағдарлама, онда кәсіпкерлер тобына оқыту ұсынылады. Бұл бағдарламалар презентациялар мен іскерлік конкурстар түрінде өтеді.
Іс-шараны ұйымдастырушылардың айтуынша, стартаптарды анықтау және жеделдету мақсатында мемлекеттік және жеке инвестицияларды тартатын таза технологиялар саласындағы 30-40 перспективалы жобаны іріктеу бойынша жыл сайын конкурстар өткізілетін болады. Іріктеу 7 бағыт бойынша жүргізіледі: энергия тиімділігі, ЖЭК, қалдықтарды басқару, суды тиімді пайдалану, заманауи материалдар мен химиялық заттар, жасыл құрылыс және көлік. 3 жылдық бағдарламаның қорытындысы бойынша мемлекеттік қолдаудың көмегімен 100-ге жуықкомпания оқудан (акселерациядан) өтеді деп күтілуде.
