Бүгін Х. Бөкеева атындағы облыстық қазақ драма театрында «ДАЛА ДИДАРЫ» көшпелі өнер ұжымының маусымашар концерті өтті. 
Концертті «Ерен еңбегі үшін» медалінің иегері, жазушы-журналист Бауыржан Ғұбайдуллин жүргізді. Ең әуелі экраннан ақынға арналған бейнебаян көрсетілді. Содан соң сөз алған жоба жетекшісі Бауыржан Халиолла Қадыр Мырза Әлінің күллі қазаққа ортақ тұлға екенін айта келе, өнер ұжымының алдағы уақыттағы шығармашылық сапарларына тоқталды.
Іс-шара барысында Қазақстанның еңбек сіңірген қайраткері, әнші-композитор Донеділ Қажымов, ҚР Мәдениет саласының үздігі Қайрат Какимов, «Ерен еңбегі үшін» медалінің иегерлері Дастан Есентеміров, Ернар Өмірәлі, республикалық конкурстардың лауреаттары Альберт Ғазизжанов, Мәди Сабыров, Ерлан Қуанышев, Әділ Ахметов, «Інжу» және «BatysStar» топтары өнер көрсетті.
Қадыр Мырза Әлінің сөзіне жазылған «Ақжайық», «Қазақтарды шетелдік қонақтарға таныстыру», «Тамды аруы», «Әже туралы ән», «Тамаша», «Жар», «Сыған серенадасы», «Кездер-ай», «Орал – әнім сенсің шалқыған», «Жол жыры», «Өз елім» және «Атамекен» секілді әндер шырқалды.
Өз кезегінде облыс әкімі Нариман Төреғалиев көшпелі өнер ұжымына сәттілік тілеп, Қадыр Мырза Әлі атындағы мәдениет және өнер орталығы мәдени-шығармашылық бөлімінің басшысы Жамиға Камалованы және дыбыс режиссері Мейірхан Аюповты «Батыс Қазақстан облысының үздік мәдениет қызметкері» төсбелгісімен марапаттады.
Жалпы бұл Қадыр мұрасын насихаттауға бағытталған әдеби-сазды кеште әуезді әндер жанды дауыста орындалды. Қадыр Мырза Әлінің өзінің оқуындағы өлең де көрермен назарына ұсынылды. Ақ Жайық өңірінің ардақты перзентінің қанатты сөздері, қағытпа қалжыңдары айтылып, қуатты жырлары оқылды. Өлеңдерді нақышына келтіре оқыған Асылан Ислямов, Гүлфаризат Нұрсейітова, Ақмоншақ Есетова, Әділ Ахметов секілді өнерпаздар.
Көрермендер Қадыр мұрасын насихаттаушыларды қолдап-қошеметтеп, осынау рухани кеште ерекше әсерге бөленді.
Марлен Ғилымхан,
zhaikpress.kz
