Елімізде «Үздік педагог» республикалық байқауы басталды.
ҚР Оқу-ағарту министрлігінің хабарлауынша, оған меншік нысанына және ведомстволық бағыныстылығына қарамастан барлық мектепке дейінгі, орта, техникалық және кәсіптік білім беру ұйымдарының штаттық педагог қызметкерлері қатыса алады.
Конкурс аудандық, облыстық және республикалық кезеңнен тұрады. Үміткердің педагогикалық қызметте жоғары жетістіктері және конкурсқа қатысу кезінде кемінде бес жыл үздіксіз педагогикалық тәжірибесі болуы керек. Байқаудың бірінші кезеңіне қатысуға 1311 өтінім берілген.
Қазіргі уақытта аудандық пен қалалық комиссия олардың портфолиосын бағалап жатыр.
Екінші кезеңде әр аудан мен қаладан 100 ұпайдың 80 пайызынан кем емес ұпай жинаған 10 қатысушы таңдалады.
Республикалық байқаудың үшінші кезеңі осы жылдың қыркүйек айында өтеді.
Республикалық кезеңнің қорытындысы бойынша 64 жеңімпаз «Үздік педагог» куәлігімен, «Үздік педагог» төсбелгісімен және 1 000 АЕК (3 450 000 теңге) көлемінде ақшалай сыйлықпен марапатталады.
