Ақсайда қала күніне орай "Дала қызықтары" атты мерекелік спорттық шара ұйымдастырылды. Екі апта бойы тойланып келе жатырған қала күні аясында өткен кезекті шарада бірнеше ұлттық спорт түрлерінен сайыс өтті.
Ұлттық-бұқаралық спорт түрлерінен өткен тартысты сайыстарға Бөрлі ауданының әкімі Еркебұлан Ихсанов қатысты. Сондай-ақ Шыңғырлау ауданының әкімі Мұрат Өміралиев те мерекелік шараға арнайы келді.
Қаланың солтүстік айналма жолында орналасқан атшабар аумағында өткен "Дала қызықтарында" ауданға қарасты ауылдық округтер арнайы киіз үй тігіп, шараның шырайын ашты. Ұлттық құндылықтарды насихаттауға бағытталған мерекеде қала тұрғындары мен қонақтары бірнеше спорт түрінен бақ сынауға мүмкіндік алды. Соның ішінде қатысушылар садақ ату, қазақ күресі, арқан тартыс, аударыспақ пен гір көтеруден сынға түсті.
Спорттық сайыс жеңімпаздарына қомақты қаржылай жүлделер де табысталды.
Мәселен, үш салмақ дәрежесінде өткен аударыспақта ІІІ орын иеленгендерге 15 мың, ІІ орынға 25 мың және І орынға 30 мың теңге табысталды.
Қазақ күресі бойынша белдескен түйе палуандардың ІІІ орын иегері 200 мың, екінші орынды жеңіп алған спортшы 500 мың және І орын алған жеңімпаз 1 млн теңге иеленді.
Ал спорттық жарыстардың ең қызықтысы құнан, топ және аламан бәйгеде болды. Еліміздің әр аймағынан келген шабандоздар қатысқан бәйге бәсекеге толы әрі қызықты өтті. Құнан бәйгенің жүлдесіне 80, 120 және 200 мың тігілсе, топ бәйгеде топ жарғандарға 200, 300 және 500 мың теңге көлемінде марапат ұсынылды.
Ал 24 шақырымға созылған аламан бәйгеде тұлпары үшінші келген атыраулық Алтынбек Хамит 500 мың теңге, ІІ орын иеленген сырымдық шабандоз 700 мың теңгені жеңіп алды.
Ал аламан бәйгенің бас жүлдесін жеңіп алған Ақтөбе облысының атбегісі Қайрат Ізбасаровқа су жаңа автокөліктің кілті табысталды.
А.Нұразғали,
Бөрлі ауданы
zhaikpress.kz
