Бүгін Жаңақала ауданына қарасты, Көпжасар ауылында дала қызықтары өтті. Игі шара Көпжасар ауылының 60 жылдық мерейтойы аясында ұйымдастырылды. Аудан әкімі Алпамыс Көшкінбаев ауыл тұрғындарын мерейлі мерекемен құттықтап, сайысқа қатысушыларға сәттілік тіледі.
Даланы дүбірге бөлеген мерекеде ұлттық ойындар сынға түсті. Атшабардағы төбеге жиналған халықтың қарасы көптеп жиналды. Халықтың қазынасы саналған ат спорты кеңінен дәріптеліп, топ бәйге, тай жарыс, жабы аттар арасында 12 шақырымдық бәйге және шабандоз шыңдалатын, сәйгүлік сыналатын білектілер қатысқан Көкпар ұлттық ойыны жиналған жұртшылықтың делебесін қоздырды.
Сонымен қатар түйе жарыс, қой көтеру, арқан тартыс жарыстары мерекелік шараны қыздыра түсті.
Киіз үй тігіліп, мерекеге келген қонақтар мен ауылдықтар ақтан ауыз тиіп, көркемөнерпаздардың өнерлерін тамашалады. Ауқымды шараның өтуіне шаруа қожалықтары, кәсіпкерлер белсенділік танытып, демеушілік көрсетті.
Шашасына шаң жұқтырмай оза шапқан жеңімпаздар ақшалай сыйлықтармен және алғысхаттармен марапатталды.
Зара Жәрдемова,
Жаңақала ауданы
zhaikpress.kz