Кеше кешкі сағат он екі шамасында Теректі ауданына қарасты Ұзынкөл ауылдық округінде төтенше жағдай жарияланды.
Су қоймасындағы су деңгейінің көтерілуінен ауылымызды су басу қауіпі төнді. Төтенше жағдайлар бөлімінің қызметкерлері, еріктілер, ауыл тұрғындары қызыл судан зардап шеккен тұрғындарды Орал қаласындағы арнайы білім беретін № 15 мектепте ұйымдастырылған эвакуациялық пунктке орналастырды.
Бірінші кезекте балалар, қариялар, мүгедектігі бар жандар жөнелтілді. Қауіпсіз аймаққа көшіру таңға дейін жалғасты. Шамамен алты жүзге жуық ауыл тұрғыны көшірілді. Олардың ішінде қаладағы тума-туыстарына барғандар да болды.
Эвакуациялық пунктте барлық жағдай жасалған. Ешқандай шағымымыз жоқ. Ауылымызда су басу қаупі сейіліп, аман-есен үйімізге оралсақ екен. Тек тыныштық болсын деп тілеп отырмыз.
Мейрамгүл Сатханова,
Ұзынкөл ауылының тұрғыны
