"2024 жылдың 3-4 сәуір аралығында М.Өтемісов атындағы Батыс Қазақстан университетінде белгілі ақын, батыр Махамбет Өтемісұлының туғанына 220 жыл толуына орай «ІІІ Umit - 2024» республикалық студенттік театрлар фестивалі өтті. Бұл іс-шара театр өнері және оның рухани-адамгершілік тәрбиедегі рөлі арқылы студенттердің шығармашылық қабілеттерін дамытуға ықпал етуге арналды", - деп хабарлайды ҚР ғылым және жоғары білім министрлігі.
Фото: www.gov.kz
Фестивальдің басты мақсаты - студенттердің шығармашылық әлеуетін дамыту, отандық драматургтердің шығармалары есебінен студенттік театрлардың репертуарын кеңейту, сондай-ақ театр қойылымдарының көркемдік деңгейін арттыру.
А.Н. Островский атындағы драма театр сахнасында еліміздің 6 өңірінен 6 студенттік театр өнер көрсетті. Сондай - ақ аталған фестивальдің негізін қалаушылар - Л. Гумилев атындағы ЕҰУ мамандары биыл III Umit-2024-ке арнайы қонақ ретінде қатысты.
2 күнге созылған фестиваль нәтижесінде С.Сейфуллин атындағы Қазақ агротехникалық зерттеу университетінің "Ақжелкен" студенттік театры көрермендерді "Ақын мен ажал" қойылымымен тамсандырып, бас жүлдені қаңжығаларына байлады. Фестивальдің күміс жүлдегерлері - "Қарагөз" спектаклі үшін Қорқыт Ата атындағы Қызылорда университетінің "Жауқазын" студенттік театры. Ал үшінші орынды Абай атындағы Қазақ ұлттық педагогикалық университетінің "Үркер" студенттік театры "Алғашқы ұстаз" қойылымы үшін иеленді.
Бұдан басқа қатысушылар арасынан "Үздік ер адам рөлі", "Үздік әйел рөлі" және «Көрермендер көзайымы» номинациялары табысталды.
"Үздік ер адам рөлін" Семей қаласының Шәкәрім атындағы университетінің "Қаракөз" жастар театрының "Мұңлы муза" қойылымындағы рөлі үшін С. Мағауияұлы, "Үздік әйел рөлін" "Шкафта қанқам сойлейді" қойылымы үшін Х. Досмұхамедов атындағы Атырау университетінің "Саф" студенттік театрынан Н.Сат иемденді.
Көрермендер көзайымы сыйлығы Қазақ ұлттық қыздар педагогикалық университетінің "Өнер Жастан" студенттік театрынан Б.Қалдыбайға тапсырылды.
Сонымен қатар актер, театр режиссері, ҚР еңбек сіңірген әртісі, ҚР Мемлекеттік сыйлығының лауреаты С.Қажымұратовтың атынан Семей қаласының Шәкәрім атындағы университетінің "Қаракөз" студенттік театрының жетекшісіне "Мұнлы муза" қойылымы үшін арнайы сыйлық табысталды.
Фото: www.gov.kz
