Астана қаласында бокстан 22 жасқа дейінгі жастар арасындағы Азия чемпионаты аяқталды. Сары құрлықтың мықты жас былғары қолғап шеберлері бас қосқан шаршы алаң додасында 14 алтын медаль жеңіп алған ұлттық құрама боксшылары жалпы есепте бірінші орынға табан тіреді.
Қазақ бокс мектебінің кезекті жеңісіне өңір спортшылары да өз үлесін қосты. Азия біріншілігінде ел намысын қорғаған үш боксшымыз жеңіс тұғырының ең биік сатысына көтерілді.
Алдымен қыздар арасында 66 келі салмақ дәрежесінде өнер көрсеткен Ақнар Ищанова алтыннан алқа тақты. Ақнар қыз финалдық жекпе-жегінде өзбек елінің намысын қорғаған Айсане Сәруәрованы жеңді.
Артынша 18 жасқа дейінгі жастар арасында шаршы алаңға шыққан Өнер Сейілхан 71 келі тартатын боксшылар бәсекесінің жеңімпазы атанды. Өнер Үндістаннан келген Пряншу атты спортшыны сабап тастады.
Ал 22 жасқа дейінге жастар сынында өнер көрсеткен тағы бір боксшымыз Сабыржан Аққалықов та үмітті ақтады.
71 келіде өнер көрсеткен Сабыржан финалдық бәсекеде тәжік спортшысы Давуд Махамовты 5-0 есебімен жеңді.
Түгелбай Бисен,
zhaikpress.kz
