Кеше Казталов ауданына қарасты Болашақ ауылының мәдениет үйінде облыстық, республикалық жыр мүшәйларының жүлдегері, ақын Райымбек Саматовтың "Қаңғыбас көңіл" атты жаңа жыр жинағының тұсаукесер рәсімі өтті.
Киелі мекеннен Сағит Садықов, Сарсенғали Бисенғалиев, Ұлдай Сариева, Дариға Мұштанова, Хатимолла Бердіғалиев сынды қаламы жүйрік талай ақын-жазушылардың шыққаны елге мәлім.
Өлкеміздің жас ақыны бұған дейін "Көңілдегі күз" жыр жинағын жарыққа шығарған болатын. Жас ақын екі жыл салып "Қаңғыбас көңіл" жыр жинағы қалың оқырманға жолдап отыр.
Ауыл тұрғындары ең алдымен ақынның жыр жинағынан құралған театр қойылымын тамашалады.
Кітаптың тұсаукесеріне келген рухани іс-шараға ақын, ұстаз, "Жиембет жырау" атындағы әдеби сыйлығының лауреаты, Қазақстан және Қырғызстан жазушылары одағының мүшесі, облыстық “Ақберен” ақындар мектебінің жетекшісі Талап Таймасұлы, аудан әкімінің орынбасары Зәйлім Мәжитова, А.Байтұрсынов ат.ЖОББМ қазақ тілі және әдебиет пәнінің мұғалімі, ұстаз Анаргүл Мұхтарова, “Жансебіл” жыр жинағының авторы, ақын Абылайхан Мақсұтов, “Әлем халықтары және түркі әлемі” Жазушылар одағының мүшесі, жазушы, ақын Нұрлан Едігенов, Райымбектің әжесі - Зейнеп әже, өнерде бірге жүрген достары қатысты.
Жазушылар одағының мүшесі, облыстық “Ақберен” ақындар мектебінің жетекшісі Талап Таймасұлы мен аудан әкімінің орынбасары Зәйлім Мәжитова жас ақынға жылы лебіздерін білдіріп, кітаптың лентасын кесті. Оқырманға жол тартып отырған бұл кітапта мөлдір махаббатқа толы лириканы да, өзінің болмысына тән өміршеңдікті де байқауға болады. Сонымен қоса өз туындыларында тұрақсыз көңіл күй, құбылмалы қоғамның кей тұстарын өлеңмен өрнектеп, халыққа жеткізген.
Шараның барысында ақынның жүрегінен шыққан отты жырлары көрерменге жол тартты. Айта кету керек, рухани азық сыйлаған кеште Райымбектің сөзіне жазылған Болашақ ауылының әнұранының тұсауы кесілді.
Кеш соңында ауыл әкімі Артур Берденов жас ақынның басына тақия кигізіп, иығына шапан жапса, аудан әкімінің орынбасары Зәйлім Исатайқызы естелік сыйлық табыстады. Ауыл жанашыры, кәсіпкер Дархан Сапаров ізгі ниетін білдіріп, ат мінгізді. Өз кезегінде ақын Райымбек Саматов кітаптың жарыққа шығуына атсалысқан барша жанға алғысын білдірді.
Жиналған қауым жаңа кітаптың жарыққа шығуымен қаламгерді құттықтап, жылы лебіздерін арнады.
Батырын пір тұтып, ақынын ардақтаған Қос Өзен елінің қашанда тұғыры биікте тұрары сөзсіз!
Гүлнұр Сәуірғалиқызы,
Казталов ауданы
