Бәйтерек ауданына қарасты Достық ауылында біраз үй суға кетті. Арнайы комиссия су басқан екі үйді тұруға жарамсыз деп таныған.
Наурыздың 31-і күні көтерілген ауыл іргесіндегі Шаған өзені суы Ақмарал Сламғалиқызының баспанасына кіріп, үйді жарамсыз етті.
Ауылдасы ауыр жағдайға тап болғанда округ әкімі Әбубәкір Төлеуов Ақмарал апайдың отбасына уақытша тұратын үй тауып берді.
– Топан су үш бөлмелі үйімді жарамсыз етті. Су 13 күн бой баспанамда қылқып тұрды. Уақытша тұруға үйін берген ауылдасым біраз уақыт пәтерақы алмады, - дейді Ақмарал Сламғалиқызы.
Бүгін Ақмарал апамыз жаңа үйге қоныстанды. Үкімет тарапынан берілген барлық өтемақыны алған.
Тасқын кезінде аудандық төтенше жағдайлар бөлімі мен округ әкімдігі және жергілікті тұрғындар бірігіп, тасқынның күш алуына жол бермеген. Десе де тасқын 20 шақты үйге кіріп үлгерді. Достық ауылдық округі әкімдігінің бас маманы Зәуре Бәйкенованың айтуынша, суға кеткен барлық тұрғынға өтемақы төленген.
– Су қатты басқан екі үйдің біріне күрделі жөндеу жасалады. Ол отбасыға қажетті қаражат берілді. Одан бөлек біраз тұрғын бір реттік жәрдемақы алды, - дейді Зәуре Байкенова.
Түгелбай Бисен
zhaikpress.kz
