Қаратөбедегі орталық мешітте Абай күні мерекесіне орай тағылымы мол шара өтті.
Мешітке жиналған жастар халқымыздың руханиятын әлемге танытқан теңдесі жоқ Абай мұрасына қанығып, оның ойшыл философиясының тұнығына тереңдеді.
Тағылымды шараны ұйымдастырушы «Ізгілік» қоғамдық бірлестігінің төрағасы Әмірбек Жәнібеков жиналған жастарды Абай күні мерекесімен құттықтап, басқосудың мәні мен маңызына тоқталып өтті.
Кездесуде сөз сөйлеген аудандық мешіттің бас имамы Әділжан Бекқазиев Абай шығармаларындағы дәстүрлі діннің көрінісі мен сол қоғамдағы діни ахуал турасында әңгімелеп берді.
Сөз сөйлеген аудандық ішкі саясат бөлімінің басшысы Нұртас Сафуллин Абай өміріндегі және ұлы ойшылдың соңында қалған мол мұрасында қазақы дәстүрдің насихатталуына тоқталды. «Қаратөбе өңірі» газетінің бас редакторы Бекжан Қойшекенов һәкім Абайдың қарасөздерінен түрлі мысал келтірді.
Танымдық шара барысында Абайдың шығармашылығынан түрлі сұрақтар қойылып, жауап берген жастарға сыйлықтар ұсынылды. Мешітке жиналған жастар Абай Құнанбаевтың «Желсіз түнде жарық ай» әнін шырқаса, енді бірі «Ғылым таппай мақтанба» өлеңін мәнерлеп оқып берді.
Серікбай Хасанов
Қаратөбе ауданы
zhaikpress.kz
