Батыс Қазақстандағы халықаралық және республикалық тасжолдар қыс мезгіліне дайын. Бұл туралы zhaikpress.kz редакциясының сұрағына жауап берген БҚО Жол активтері Ұлттық сапа орталығының бөлім басшысы Манарбек Амиров айтты.
Сурет: freepik.com
Халықаралық және республикалық маңызы бар тасжолдарды күтіп ұстау «ҚАЖсервис» ЖШС-нің мойнына жүктелген.
Батыс Қазақстан облысы бойынша халықаралық және республикалық маңызы бар автомобиль жолдарының жалпы желісі 1 349 шақырымды құрайды, оның 245 шақырымына күрделі жөндеу жүріп жатыр.
– «ҚАЖсервис» мердігер ұйымында төрт жол пайдалану бөлімі, 105 бірлік техника бар. Подстепный, Тасқала, Жымпиты, Чапаев, Тайпақ және Жалпақтал елді мекендерінде 38 төсек-орынға арналған алты жылыту пункті және қысқы күтіп-ұстауға арналған алты гараж, химиялық реагенттерді сақтауға арналған тоғыз орын, үш құм базасы, мен алты қойма дайындалды, - деп атап өтті Манарбек Амиров.
2024-2025 жылғы қысқы кезеңге кемінде 25 000 тонна мөлшерінде құм-тұз қоспасын дайындау жоспарланған. Бүгінде мердігер компания 30 шақты жаңа техника алған.
Бұлардың бәрі қыста автомобиль жолдарын күтіп ұстауға жұмылдырылады деп атап өтті мамандар.
Жанат Қайырғожина
zhaikpress.kz
