БҚО мәдениет, тілдерді дамыту және архив ісі басқарамасының ұйымдастыруымен техникалық және кәсіптік білім беру ұйымдарының, яғни колледждердің өзге этнос өкілдері студенттері арасында «Мемлекеттік тіл – тәуелсіздік символы» байқауы өтті.
Байқаудың негізгі мақсаты – мемлекеттік тіл саясатын қолдау, өзге этнос өкілдерін қазақ тілін үйренуге ынталандыру, күнделікті өмірлерінде қолдануға қызығушылықтарын арттыру, қазақстандық патриотизмді дамыту, рухани құндылықтарымызды насихаттау.
Байқауға облыстағы Теректі, Тасқала аудандарының колледждері мен Орал қаласы бойынша Ж.Досмұхамедов атындағы жоғары педагогикалық колледжі, Орал политехникалық колледжі, Құрманғазы атындағы саз колледжі, Республикалық жоғары техникалық колледжі, Сервис және жаңа технологиялар колледжі, Орал ақпараттық технологиялар колледжі, Орал жоғары гуманитарлық-экономикалық колледжі, Орал «Сервис» технологиялық колледжі, Батыс Қазақстан жоғары медициналық колледжінен он үш өтініш келіп түсті.
Байқау таныстыру, ойтолғау, мақал-мәтел айту сынды үш бөлімнен тұрды.
Бірінші бөлімде байқауға қатысушы үміткерлер өзін-өзі ауызша және өлең түрінде таныстырса, екінші бөлімде экранда көрсетілген ұяшықтың біреуін таңдап, ашылған тақырыпта (Қазақстан тарихы және оның көрнекті тұлғалары, Қазақстанның дамуына үлес қосқан көрнекті мемлекет қайраткерлері, маңызды даталар және т.б.) мемлекеттік тілде ой толғады.
Ал «Мақал-мәтел айту» бөлімінде үміткерлер түрлі тақырыптар бойынша мақал-мәтелдер айтып жарысты.
Байқау нәтижесі бойынша бірінші орынды Сервис және жаңа технологиялар колледжінің студенті Мурзагалиева Алена, екінші орынды Ж.Досмұхамедов атындағы жоғары педагогикалық колледжінің студенті Юсуп Фархат, Батыс Қазақстан жоғары медициналық колледжінің студенті Мажитова Фатима, үшінші орынды Орал жоғары гуманитарлық-экономикалық колледжінің студенті Кофейникова Яна, Орал «Сервис» технологиялық колледжінің студенті Минулина Надежда, Орал ақпараттық технологиялар колледжінің студенті Голубов Кирилл иеленіп, бағалы сыйлықтармен марапатталды.
Барлық қатысушыларға алғысхат және естелік кәдесый табыс етілді.
