Бүгін қайырымдылық айлығы аясында «Батыс Қазақстан облысы мүгедектері ерікті қоғамы» қоғамдық бірлестігінің және Ғ.Құрманғалиев атындағы облыстық филармонияның бірлесіп ұйымдастыруымен мүгедектігі бар адамдар арасындағы ХХVІ облыстық шығармашылық фестивалі өтті.
Батыс Қазақстан облысының мәдениет, тілдерді дамыту және архив ісі басқармасы басшысының орынбасары Медхат Қамбетов, облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары Ділдаш Искакова, «Батыс Қазақстан облысы мүгедектері ерікті қоғамы» қоғамдық бірлестігінің төрағасы Жұмажан Қожжанов құттықтау сөз сөйлеп, қатысушыларға сәттілік тіледі.
Аталған фестивальға Жаңақала, Бөрлі, Теректі, Тасқала, Бәйтерек, Бөкей Орда, Қаратөбе, Казталов, Сырым, Шыңғырлау, Ақжайық, Жәнібек аудандарынан және Орал қаласындағы Қазақ соқырлар қоғамының, «Бойтұмар» мәдениет клубының өнерпаздары қатысып, өзара бақ сынады.
Қатысушыларға эстрадалық вокал, көркемсөз оқу, көрме номинациялары бойынша алғысхат пен қаржылай сыйлықтар табысталды.
Шара соңында ұйымдастырушылар мен қатысушылар естелік суретке түсті.
Айжан Амангельдина,
ҚР Журналистер одағының мүшесі,
Орал қаласы
