21-23 қараша күндері аралығында Ақтөбе қаласында орналасқан «Жекпе-жек» сарайында Қазақстан Республикасы Ішкі істер министрінің орынбасары – Ұлттық ұлан Бас қолбасшысының кубогіне арналған спорттық және жауынгерлік самбодан турнирі өтті. Бұл туралы ҚР ҰҰ «Батыс» өңірлік қолбасшылығының баспасөз қызметі хабарлады.
Бұл айтулы сайысқа «Оңтүстік» өңірлік қолбасшылығынан, «Орталық» өңірлік қолбасшылығынан, «Батыс» өңірлік қолбасшылығынан, «Шығыс» өңірлік қолбасшылығынан, Астана қаласындағы 5573 әскери бөлімінің және Қазақстан Республикасы Ұлттық ұлан Әскери академиясынан 100 астам спортшы қатысып, шаршы алаңға шықты.
Салтанатты шараға Қазақстан Республикасы Ұлттық ұлан Бас қолбасшысының орынбасары генерал-майор Бауржан Абжанов, Ұлттық ұланның «Батыс» өңірлік қолбасшылығының қолбасшысы генерал-майор Бекайдар Қазкеев, «Батыс» өңірлік қолбасшылығы қолбасшысының орынбасары полковник Мирас Турдалин, Ұлттық ұлан Бас қолбасшылығының дене даярлығы және спорт бастығы полковник Сәтжан Әбішев, әскер ардагерлері және бірлесіп іс-қимыл жасайтын органдардың басшылары қатысты.
Үш күнге созылған жарыс күндері боз кілемде белдескен балуандар бірінен бірінің мықты екендіктерін көрсете білді. Мұны спортқа деген жанкештіліктерімен байланыстырдық. Қай-қайсысы да намысқа тырысып, өз өңірлерінің абыройын асқақтатқысы келетіндіктері балуандардың ширақ қимылдарынан байқалды.
Сайыс нәтижесі бойынша жалпы командалық есепте бес алтын медальді олжалаған «Батыс» өңірлік қолбасшылығының спортшылары командалық есепте бірінші орынды жеңіп алды.
Екінші орынды астаналық 5573 әскери бөлімінің спортшылары алса, үшінші сатыға «Оңтүстік» өңірлік қолбасшылығының балуандары көтерілді.
Ендігі кезекте жарыстың чемпиондары ел біріншілігіне қатысып Ұлттық ұлан әскерінің намысын қорғайтын болады.
