Бүгін Орал қаласы әкімдігінің ұйымдастыруымен Мемлекет басшысының «Заң мен Тәртіп» тұжырымдамасы негізінде әрі «Таза Қазақстан» акциясы аясында шаһарда сенбілік ұйымдастырылды.
Аталмыш сенбілікке облыс және қала әкімдіктерінің және өңірдегі түрлі басқарма қызметкерлері мен қала тұрғындары қатысты. Тазалық жұмыстарына 1 мыңға жуық азамат қатысып, қала шағынаудандарындағы қоқыс қалдықтарын жиыстырды. Бұл акцияға облыстық зағиптар және нашар көретін азаматтарға арналған арнаулы кітапхана ұжымы да біркісідей атсалысты. Арнаулы кітапхананың бөлім басшысы Айжан Дәулетқалиева барша қала тұрғының алда болатын сенбіліктерге қатысуға шақырды.
Облыстық спорт басқармасының бөлім басшысы Ринат Дүйсенов қала тазалығын қамтамасыз ету – әр тұрғынның міндеті деп санайтынын жеткізді. «Бір байқағаным, табиғаттың төрт мезігілінде де облыста сенбіліктер жиі ұйымдастырылуда. Кей азаматтар тазалық жұмысымен коммуналдық қызметкерлер ғана айналысуы қажет деген пікір айтады. Бірақ бұл мүлде дұрыс емес ой. Себебі шашылған қатты қалдықтар арқылы ауаға, табиғатқа түрлі аурулар тарайды. Тазалық – ол адам денсаулығының кепілі. Әрі өзге өңірлерден келген қала қонақтарына адами болмысымызды, мәдениетімізді көрсетеміз»,- дейді ол.
Нұрым Ғұмар
«Орал өңірі»
