БҚО-да полицейлер университет ұжымымен интернет-алаяқтықтың алдын алу бойынша кездесу өткізді, – деп хабарлайды Polisia.kz.
Сурет: Polisia.kz
Махамбет Өтемісов атындағы Батыс Қазақстан университетінде "Интернет-алаяқтықтың жаңа схемалары және дропперлік үшін жауапкершілік" тақырыбында ақпараттық-түсіндіру дәрісі өтті. Іс-шара Батыс Қазақстан облысы полиция департаментінің киберқылмысқа қарсы іс-қимыл басқармасының қызметкерлері тарапынан ұйымдастырылды. Кездесу барысында полиция қызметкерлері интернет-алаяқтықтың кең таралған түрлері, жеке деректерді қорғау тәсілдері және желідегі қылмыстардың алдын алу шаралары туралы баяндады. Жаңа жыл мерекесі қарсаңында киберқауіптердің алдын алуға ерекше назар аударылды. Қатысушыларға жалған ұтыс ойындары, төмен бағамен жүргізілетін онлайн-сатылымдар, сондай-ақ таныс адамдардың атынан ақша аударуды сұрау сияқты қауіптер жөнінде ескертілді.
Сонымен қатар дропперлік ұғымы — заңсыз жолмен алынған ақшалай қаражатты қолма-қол ақшаға айналдыруға және аударуға қатысу — және ол үшін заңнамада көзделген жауапкершілік пен санкциялар түсіндірілді. Осындай кездесулер цифрлық сауаттылық деңгейін арттыруға және интернет кеңістігінде жауапты мінез-құлықты қалыптастыруға ықпал етеді.
