Қазақстан Президенті Қ.К. Тоқаев елдің экологиялық әрі климат саясатын одан әрі жетілдіруге бағытталған іргелі заңға қол қойды. Бұл құжат халықаралық міндеттемелерге сәйкес келетін шараларды қамтиды, оның ішінде нарықтық механизмдерді дамыту арқылы климат өзгеруіне қарсы іс-қимыл жүргізу көзделген. Бұл туралы Қазақстан Республикасы Экология және табиғи ресурстар министрлігі жазды.
Сонымен қатар, орман кодексіне енгізілген өзгертулерде Париж келісіміне негізделген офсеттік жобалар мен механизмдерді дамыту қарастырылған. Бұл шаралар Қазақстанның парник газдарының шығарылуын азайтуға жаһандық күш-жігерлерге қатысуын арттырып, орманды қалпына келтіру және табиғатты қорғау жобаларын ынталандыратын болады.
Бұдан бөлек, алғаш рет аймақ деңгейінде Ұлттық бейімделу жоспарларын әзірлеу нормалары қарастырылып отыр. Бұл шаралар жергілікті билік органдарына климат қауіптерін анықтап, оларды жою әрі бейімделу шараларын жоспарлап, жүзеге асыруға мүмкіндік береді, нәтижесінде елдің климаттың теріс әсеріне төтеп беру қабілеті артады.
Бұл заң — Қазақстанның тұрақты даму стратегиясына маңызды үлес қосып, жасыл экономикасын нығайтып, елдің халықаралық климат міндеттемелерін орындауға деген ұмтылысын растайтын негізгі қадам болады.
