Батыс Қазақстан облысы Полиция департаментінің басшысы, полиция полковнигі Арман Молдиярұлы Оразалиев жуырда жоғары қабаттан секірмекші болған қарияны құтқаруда полиция қызметкерлерімен қатар жүріп, көмекке келген қала тұрғынына алғыс білдірді. Бұл туралы БҚО ПД баспасөз қызметі хабарлайды.
Адам өмірін құтқару кезінде көрсеткен батылдығы, қайсарлығы мен жанқиярлығы үшін департамент бастығының бұйрығымен Аубакеров Шыңғыс Бақытжанұлына алғыс хат және қол сағаты тарту етілсе, сондай-ақ, БҚО ПД Жылдам қимылдайтын арнайы жасағының қызметкерлері полиция майоры Әлішер Ғайсин, полиция капитаны Мурзағалиев Сәндібек «Қазақстан полициясына 30 жыл» медалімен және полиция капитаны Дархан Ғалымов алғыс хатпен марапатталды.
Айта кету керек, оқиға шілденің 31 күні күні Орал қаласындағы Зашаған кентінде полицейлер автокөлікпен өтіп бара жатып, көп қабатты үйлердің бірінде төртінші қабаттың терезесінен аяғы салбырап отырған ер адамды байқап, дереу көлікті тоқтатып, ер адамды құтқаруға жүгіреді. Құтқару кезінде жиналған адамдардың ішінен көлікті сүйретуге арналған шынжыр арқаны бар жас жігіт полицейлерге көмекке келген еді. Сөйтіп бірлесе отырып, адам өмірін өлім аузынан арашалап қалады.
zhaikpress.kz
