Ауыл спортын дәріптейтін дәстүрлі «Ақ бидай» ойындарының екінші жарыс күні өз мәресіне жетті. Бұл күн облыс спортшылары үшін табысты болды. Команда қоржыны екі алтын, үш күміс және екі қола медальмен толықты.
Қазіргі уақытта бәйге түрлері, асық ату, бес асық, қол күресі мен аударыспақтан сайыстар өз мәресіне жетті. Ол спорт түрлерінің жеңімпаз-жүлдегерлері анықталды.
Алғашқы күні ат жарысына қатысқан шабандоздар үздік өнер көрсетіп, команда есебіне 46 ұпай сыйлады. Одан бөлек өңір командасы қол күресінен 8 ұпай, аударыспақтан 22 ұпай еншіленді. Асық ату жарысында 5 ұпай, ал бес асық шеберлері 10 ұпай жинады.
Осылайша, жарыстың екінші күні аяқталған сәтте Батыс Қазақстан облысының спортшылары 91 ұпайға қол жеткізіп, төртінші орынға тұрақтады.
Қазіргі таңда көш басында Түркістан, Жамбыл және Алматы облыстарының командалары тұр.
Жарыс әлі жалғасуда. Спортшылар алдағы күндері өтетін тартысты бәсекелерде жүлде қорын молайтып, үздік үштікке енуге ұмтылады деген сенімдеміз.
Түгелбай Бисен,
zhaikpress.kz.
Фото: Мейірбек Тажқұранов
