"Ақ бидай" ауыл спорты ойындарындағы тартыстың төресі шағын футбол жарысында. Жанкүйер жүрегін тулатып, алаңдағы әр сәтін айқайға бөлейтін ойынның қызығы, шешуші сәттер де жақындады.
1/4 финалда біздің өңірдің аяқдопшылары Қызылорда облысының намысты жігіттерімен жолықты. Қос команданың да мақсаты айқын - жеңіссіз қайтпау. Алаңда арпалыс, доп үшін талас, әр сәт – тартыс. Негізгі уақытта ешкім ешкімге дес бермеді. 40 минут бойы қақпалар "құлыптаулы" болды. Есеп – 0:0.
Шешім пенальтиде шықты. Нағыз жүрек жұтқандардың сәті! Сол сәтте біздің қақпашымыз Сабыржан Бақытжан алға шықты. Бір емес, екі соққыны қайтарып, команданы өрге сүйреді. Қақпашының қайсарлығынан жігер алған Ерлан Сағындықов пен Айеке Мұхаммедқанафия өз мүмкіндіктерін мүлт жібермеді.
Жеңістің дәмі – еңбекте. Тарихта тұңғыш рет біздің облыс футболшылары "Ақ бидай" ойындарының жартылай финалына жолдама алды. Бұл тек спорт емес, бұл намыс пен рухтың жеңісі. Алға, Орал!
Түгелбай Бисен,
zhaikpress.kz
Фото: Мейірбек Тажқұранов
