Александр Бублик Дубай ATP 500 турнирін сәтті бастады.
Бұл туралы Қазақстан теннис федерациясының баспасөз қызметі хабарлады.
Фото: olympic.kz
Жарыстың 7-ракеткасы болып тіркелген қазақстандық спортшы бастапқы кездесуін дүниежүзілік рейтингіде 65-орында тұрған, доданы іріктеу сайысынан бастаған чехиялық Томаш Махачпен өткізді.
Чехия өкілі матчты қарқынды бастады — 6:2.
Есесіне екінші сетте Бублик есе қайырды — 6:3.
Үшінші, шешуші партияда есеп 6:5 болып, матчқа доп бергенде, Бублик сол мүмкіндігін мүлт жіберді. Дегенмен тай-брейкте жеңісті жұлып алды — 7:6 (7:5).
Александр Бублик жүлде қоры 2,9 млн АҚШ долларына бағаланған турнирдің ширек финалына шығу үшін әлемнің 28-ракеткасы, нидерландтық Таллон Грикспорпен шеберлік байқасады.
