Әлемде әлі де 733 миллион адам аштықтан зардап шегуде, олардың көпшілігі Африка аймағында тұрады. Бұл туралы Берлинде өткен Welthungerhilfe қайырымдылық ұйымының «Аштық индексі» баяндамасында айтылды, деп жазады DW. Бүл туралы ҚазАқпарат хабарлайды.
Фото: DW
Дүние жүзінің 36 елінде дұрыс тамақтанбау жағдайы «ауыр» деп бағаланса, алты елде «өте ауыр» деп бағаланды. Азық-түлік өнімдерін өндіру мен жеткізуге қарулы қақтығыстар, әсіресе Судандағы азаматтық соғыс және жаһандық климаттық өзгерістердің теріс әсерлері кедергі болуда.
Есепке сәйкес, ерлерге қарағанда әйелдер аштықтан көбірек зардап шегеді.
Welthungerhilfe президенті Марлен Тиме (Marlehn Thieme) әлемдік қауымдастықты аштық мәселесін шешуге жеткілікті көңіл бөлмейді деп айыптады. Қайырымдылық ұйымының мәліметінше, 2022 жылы әлемде 800 миллионнан астам адам аштықтан зардап шеккен.
2023 жылы Тиме даму мен гуманитарлық көмек үшін Германияның федералды бюджетінің қысқартылуын сынға алды.
Welthungerhilfe басшысы атап өткендей, Германияның Экономикалық ынтымақтастық және даму министрлігі әзірлеген Agenda 2030 бағдарламасы және БҰҰ жариялаған тұрақты дамудың 17 мақсаты ұзақ мерзімді перспективада аштықты жеңудің жақсы стратегиясы, бірақ оны жүзеге асыру үшін «саяси ерік пен ынтымақтастық» қажет.
2022 жылы неміс қайырымдылық қоры дүние жүзінде 603 жоба аясында әлемнің 37 еліндегі 18,8 миллион адамға көмек көрсеткені атап өтілді. Есепке сәйкес, Welthungerhilfe иелігінде 341,2 миллион еуро болған, оның 97,6 миллион еуросы қайырымдылық үшін бөлінген. Сонымен қатар, Германия үкіметі мен Еуропалық Одақ тарапынан гранттар бөлінген.
