Қадыр орталығында «Елеулі есімдер» жобасы аясында ақын- жазушы, Қазақстан Жазушылар одағының мүшесі, «Ақберен» жас ақындар мектебінің жетекшісі Талап Таймасұлымен «Жырым – мидағы жасын, жүректегі шуақ» атты кездесу кеші өтті. Іс-шара барысында қаламгердің балаларға арналған «Айналайын» прозалық шығармалар жинағының «тұсауы» кесілді.
Аталмыш кешке өңірге белгілі зиялы қауым өкілдері мен қаламгерлер, ақынның замандас достары және шәкірттері қатысты. Облыстық мәдениет, тілдерді дамыту және архив ісі басқарма басшысының орынбасары Жеңіс Нығметуллин кеш иесіне ақжарма тілегін білдіріп, өңір әкімінің құттықтаухатын табыстады. Талап Таймасұлының осы күнге дейін жарыққа шыққан кітаптары оқырман қауымға жақсы таныс. Биыл асқаралы 60 жасқа толған жазушының балаларға арналған «Айналайын» прозалық шығармалар жинағы жұртшылыққа жол тартқан болатын. Қаламгердің тағы бір қуанышы – жақында немересі Хамза өмір есігін ашты. Немересінің есімі жазушы Хамза Есенжановтай болсын деген ниетпен қойылған. Оған қоса, Талап Таймасұлы Х. Есенжанов атындағы кітапханамен тығыз байланыс орнатқан.
Осы жыл жарқын жаңалықтарымен қоса, қаралы хабарларды да естіртті. Кеш иесінің ұсынысымен жиналған жұрт айтыс ақыны, әрі жазба ақын, марқұм Шолпан Қыдырниязованы 1 минут үнсіздікпен еске алады.
– Жарыққа шыққан әр кітабымның тұсаукесер кештерінде Шолпан апам жанымнан табылатын. Жайсыз хабарды естігенде күллі Ақ Жайық өңірі жұртының көзіне жас үйірілді. Шуақты жанның жарқын бейнесі өмір бойы жадымызда. Зымыраған уақыт-ай! Қадыр орталығында соңғы рет тоғыз жыл бұрын шығармашылық кеш өткізген екенмін. Ол кездегі оқушы шәкірттерім – қазір бозбала бойжеткендер. Шәкірттерімнің алды қоғамда өз орнын тапқан азаматтар қатарын көбейтті. «Ақберен» жас ақындар мектебіне келген көкөрімдердің көңілін қайтарған емеспін. Ұрпақ – әдебиеттен алыстамауы қажет, – деді Талап ақын.
Бұдан кейін Талап Таймасұлының балаларға арналған «Айналайын» прозалық шығармалар кітабының лентасы қиылды. Бұл рәсімді ҚР Жазушылар одағының Батыс Қазақстан облысындағы өкілі, «Құрмет» орденінің иегері Бауыржан Ғұбайдуллин мен Қаратөбе ауданының құрметті азаматы, «Ерен еңбегі үшін» медалінің иегері Тілекқабыл Сағынов атқарды. Бауыржан Файзоллаұлы мерейтой иесін құттықтап, жылы лебізін былайша жеткізді.
– Талап Таймасұлы өзі әдеби тұрғыда жазып-сызумен ғана шектелмей, ұзақ жыл бойы шәкірт тәрбиелеп келеді. Талай қауырсын қаламгерлерге қанат бітірді. Талап ақынның өлеңдері шекара асып, көршілес қырғыз және өзбек бауырларға жетті. Оқырмандарың, соңыңнан ілескен шәкірттерің шығармашылық арнаңды кеңейте берсін! Қазақстан Жазушылар одағы басқармасының төрағасы, танымал жазушы Мереке Құлкенов қос қуанышыңызға ортақтасып, Алматыдан арнайылап құттықтаухатын жолдаған еді. Бұл құттықтаухатта Қазақстандағы барша ақын-жазушылардың, яғни қаламдас әріптестеріңнің игі тілегі, ізгі ниеті, пейіш пейілі бар деп қабылдағайсың, – дей келе өңір басшысы Нариман Төреғалиев пен Жазушылар одағының Батыс Қазақстан облысындағы өкілдігі атынан «Ақжайық» шипажайына жолдама табыстады.
Талап Таймасұлының шығармалары өмірден алынған оқиғаларға негізделген. «Айналайын» кітабындағы шағын әңгімелер санада жаңғырған балалық дәуреніндегі естеліктері екен.
– Бала күнімде Қалдығайтыда тұратын нағашыларыма жиі баратынмын. Ауылдың сотқар балалары алдымнан кезіккенде «қоқандап» шыға келетін. Кейін бұл ауылда бір қара баламен танысып, дос болдық. Ол менің қорғаушым болды, әрі мектеп табалдырығын бірге аттадық. «Айналайын» шығармалар жинағында «Алғашқы достық» деген әңгіме бар. Әңгіме желісінде мені ауыл балаларынан қорғаған Тыныштық құрдасымның балалық бейнесі суреттелген. Тыныштық досым қазір осында. Оны көріп қуанып отырмын. Мені қолдап, бүгінгі шығармашылық іс-шараға келген баршаңызға дән ризамын! – деді Таймастың Талабы.
Шырайлы шара барысында ақынның өлеңдеріне жазылған әндер шырқалды. Жас ақын Дәурен Шамұратов ұстазына арнаған арнау өлеңін оқыды. «Ақберен» жас ақындар мектебінің шәкірттері Нұрдана Темір, Назар Иманқұлова және арнаулы кітапхана қызметкері Гүлмайра Сәменова ақын өлеңдерін оқыды.
Нұрым Ғұмар,
«Орал өңірі»
