«Алтын сапа» - 2020» байқауына өтініш қабылдау жалғасуда. Биылғы байқау барысында аймақтық көрмелер мен «Қазақстанның үздік тауары» республикалық байқау-көрмесі өтпейді.
Оған Қазақстан Республикасының Бас мемлекеттік санитариялық дәрігері Ж.Бекшиннің 2020 жылғы 12 наурыздағы «Қазақстан Республикасында пандемия кезеңінде коронавирустық инфекцияның әкелінуі мен таралуына жол бермеу жөніндегі шараларды күшейту туралы» №20 қаулысы басшылыққа алынып отыр. Аталмыш конкурс Қазақстан Республикасы Президентінің Жарлығына сәйкес жыл сайын өтіп келеді. Байқауға Қазақстан Республикасының аумағында тауарлар өндірумен (қару-жарақ пен әскери техника өндіруді қоспағанда), қызметтер көрсетумен айналысатын жеке кәсіпкерлер мен заңды тұлғалар қатыса алады. Байқауға мемлекеттің қатысу үлесі 50%-дан асатын ұйымдар, сондай-ақ белгіленген тәртіп бойынша қалпына келтіру және банкроттық рәсімдерін жүзеге асыру туралы шешімдер қабылданған ұйымдар қатыса алмайды. Байқауға қатысып, бағын сынап көргісі келген кәсіпкер 2020 жылдың 1 шілдесіне дейін www.altynsapa.kz. сайтына конкурсқа қатысушылардың материалдарын рәсімдеу, ұсыну және алдын ала бағалау ережелеріне сәйкес өтінім мен материалдарын (есептерді) электронды нұсқада тапсыруы тиіс.
Биыл көшпелі-оқыту семинарлары ұйымдастырылмайды. Кәсіпкерлерді оқыту мақсатында видеосабақтар дайындалып, олар www.altynsapa.kz. сайтына жарияланады.
Ясипа Рабаева
zhaikpress.kz
