Орал қаласында 2021-2023 жылдарға арналған «Аулаларды кешенді абаттандыру» бағдарламасы бойынша 29 аула абаттандырылуда.
Биыл жалғасын тапқан ауысымды жобалар аясында шілде айында 22 ауланың кіреберіс жолы жөнделді. 29 аулаға шағын архитектуралық пішімдер орнатылса, тағы 29 аула жарықтандырылды.
Сонымен қатар сегіз аулада балаларға арналған ойын алаңқайлары мен спорт алаңдары жасақталды. Төрт аулада алаңдарға түрлі-түсті резеңке төсем төсеу жұмыстары жүргізілуде.
Тағы бес аулада балалардың ойын алаңқайларын және спорт алаңдарын (тренажерлер) жасақтау үшін орын дайындалуда.
Бұл аулаларды толық абаттандыруды биыл мәресіне жеткізу жоспарланған. Жалпы, аулаларды абаттандыру барысында жоба бойынша кіреберіс жолдар салу, асфальтбетон жабын төсеу, борттық тастар төсеу, балалардың ойын алаңдары мен спорт алаңдарын (тренажерлер) жасақтау, сондай-ақ кіші сәулеттік үлгілер (орындықтар және қоқыс жәшіктері түрінде) орнату сияқты жұмыстар қарастырылған. 2021 жылы 19 ауланың аумағын абаттандыру бойынша жобалық-сметалық құжаттама жасақталып, сараптаманың оң қорытындысы алынған. Енді қаражат бөлінген жағдайда абаттандыру жұмысы басталады.
Нұрлан Ғаппар,
zhaikpress.kz
