Ұлттық спортты ұлықтау мақсатында қолға алынған "Бабалар ізімен" атты лига мәресіне жетті.
Наурыз мерекесі қарсаңындағы ұлттық спорт күнінде шымылдығы ашылған дода мамырдың 3-і күні тай және құнан бәйгесімен қорытындыланды.
Өңір әкімдігі, облыстық дене шынықтыру және спорт басқармасының қолдауымен қалалық спорт бөлімі, "Орал" спорт клубы бірлесе ұйымдастырған жарысқа 400-ге жуық спортшы қатысты.
"Орал" спорт клубының директоры Орынбасар Ғилымовтың айтуынша, бәйге алдында әр ауданда іріктеу кезеңі өткен.
- Жарыс ережесі бойынша әр ауданнан 5 тай мен 5 құнан финалдық жарыста бақ сынауға мүмкіндік алды. Алда "Ақ бидай" спартакиадасы келе жатыр. Осы сында үздік болғандар сол жарысқа жолда алады, - деді Орынбасар Ғилымов.
"Бабалар ізімен" лигасының қорытынды жарысы тартысты өтті. Облыстық бәйге федерациясының президенті Сатқали Байзуллин жарысқа құнан мен тай жарысының таңдалуының да өзіндік мәні барын айтады.
- Осы бәйгеде үздік атанған құнандар ел чемпионатына жібереміз. Бұл жарыс сол байрақты бәсекеге дайындық. Ал тай жарысын таңдауымыздың себебі жас шабандоздардың шеберлігін шыңдау, -деді Сатқали Байзуллин.
Орал даласын дүбірге бөлеген бәйге қорытындысында Құнан бәйгені Азамат Жұмашев, тай жарысын Бақтыгерей Аяпбергеновтің жүйрігі жеңіп алды.
Барлық жеңімпаздар мен жүлдегерлерге қомақты ақшалай сыйлық берілді. Бәйге 1-5 орын иелеген аттарға берілді.
Түгелбай Бисен,
zhaikpress.kz
Суреттер: Орал қаласының дене шынықтыру және спорт бөлімі
