Елімізде бір келі бананның бағасы орта есеппен 800-1100 теңге. «ҚазАқпарат» агенттігінің тілшісі экзотикалық жемістің бағасына шолу жасап көрді.
Сурет: freepik
Қазақстанға банан көбіне Эквадордан әкелінеді. Сөрелерде танымал Кавендиш сорты басым. Плантан да кездеседі. Шағын банандар да ара-тұра сөреден орын табады. Олардың құны Кавендиштен екі-үш есе қымбат. Мысалы, Алматыда әр келісін 3600 теңгеге, Қостанайда 1560 теңгеге сатып алуға болады.
Өңірлерде қарапайым банан кем дегенде 800-900 теңгеден сатылуда. Атап айтсақ, экзотикалық жемісті мұндай бағамен Шымкент, Түркістан, Талдықорған, Көкшетау, Қарағанды, Петропавл, Қостанай, Астана, Ақтөбе, Орал, Семей, Тараз қалаларынан сатып алуға болады. Ал, Павлодар, Ақтау, Қонаев, Өскемен, Жезқазған және Алматы қалаларында баға 950-1000 теңге аралығында. Атырауда баға 1000 теңгеден асып түсті.
Ең арзан бананды Қызылордада табасыз. Келісі 700 теңгеден сатылып жатыр. Ал Алматыда интернет-дүкендерден банандарды бір-біреуден сатып алуға болады. Әрқайсысының бағасы 221 теңгеге бағаланады.
Былтыр Түркістан облысында банан өнеркәсіптік көлемде өсіріле бастағаны белгілі. «GenGroup Qazaqstan» түрік компаниясы аймақта банан ағаштары өсірілетін 5,3 гектар жерге жылыжай кешенін салды. Банан сорты арнайы өсіріліп, Қазақстанның климаттық жағдайына бейімделген. Олар жылына 1 мыңға дейін банан өндіруді көздеп отыр. Биыл алғашқы 600 тонна жиналмақ. Отандық банандар әуелі Шымкент пен Алматының базарларында пайда болады. Кейін еліміздің басқа аймақтарына жеткізу жоспарланып отыр. Айтпақшы, бағасы импорттық бағадан төмен болады деп уәде етілген.
Globalproductprices.com порталы 79 елдегі банан бағасын жинақтайтынын атап өткен жөн. Олардың Наурыз айындағы рейтингі бойынша Қазақстандағы банан бағасы орташа есеппен 1025 теңгені құрап (шамамен $2,3), 14-ші орынға жайғасқан.
Сәуір айының қорытындысы бойынша ҚР Ұлттық статистика бюросы бананның орташа бағасын 987 теңге деп көрсетті. Ең арзан баға Қарағандыда тіркелді – келісі 814 теңге. Ал ең қымбат банан Ақтауда – 1195 теңге.
Ал Numbeo.com маусым айының басындағы мәліметтерді ұсынды. Портал рейтингі бойынша елімізде бананның орташа құны 933 теңгені (2,09 доллар) құрап отыр. 95 елдің ішінде Қазақстан бұл көрсеткіш бойынша 20-орынға тұрақтаған.
