Баспана жалдау субсидиясына 37 074 өтініш түсіп, 7 916-сы мақұлданған, деп хабарлайды ҚазАқпарат тілшісі.
Индустрия және инфрақұрылымдық даму министрінің орынбасары Еркебұлан Дауылбаев Сенаттың үкімет сағатында осындай мәлімет келтірді.
«24 қарашадағы жағдай бойынша 37 074 өтініш қабылданып, 7 916 өтініш мақұлданды. 1 944 өтініш бойынша төлем тағайындалып, 1 877 төлем жүргізілді.
Бағдарламаның қолжетімділігін арттыру мақсатында тұрғын үй төлемдерін тағайындау 17 рәсімнен 12 рәсімге дейін қысқарды.
Сонымен қатар, өтініш берушінің табысын есептеуден зейнетақы және әлеуметтік төлемдер алып тасталады», - деді вице-министр.
Аталған бағдарламаның шарты бойынша, баспана жалдау ақысының 50%-ы бюджет есебінен жабылса, қалған 50%-ын жалға алушы өз есебінен төлейді.
Жалдау төлемінің 50%-ын жабу республикалық бюджеттен 80% және жергілікті бюджеттен 20% мөлшерінде жүргізіледі.
2022 жылы республикалық бюджеттен 40 млрд теңге және жергілікті бюджеттен 10 млрд теңге қарастырылған.
