Батыс Қазақстан облысы Полиция департаментінің экстремизмге қарсы іс-қимыл басқармасы мен Сырым аудандық полиция қызметкерлері бірлесіп жүргізген жедел-іздестіру іс-шараларының нәтижесінде Сырым ауданының ауылдарының бірінің екі тұрғыны заңсыз қару мен есірткі заттарын сақтағаны үшін ұсталды.
Күдіктілердің тұрғын үйлеріне жүргізілген тінту барысында келесі тыйым салынған заттар тәркіленді:
Бірінші күдіктіден:
тіркелмеген тегіс ұңғылы аңшылық мылтық;
нарезді қаруға арналған 4 оқ-дәрі;
тегіс ұңғылы қаруға арналған 2 оқ-дәрі;
қорада жасырылған жасыл түсті, ұнтақталған өсімдік тектес (есірткі затына ұқсас) 500 грамнан астам зат;
6 қолданылған шприц пен пластик бөтелке (есірткі қолдануға арналған болуы мүмкін).
Екінші күдіктіден:
үй ішінен табылған газетке оралған өсімдік тектес зат;
ауладан табылған үш пакет өсімдік тектес зат;
өсімдік заты бар үш шприц;
есірткіні дайындауға және тұтынуға арналған арнайы құрылғылар.
Аталған факті бойынша қылмыстық іс қозғалды. Барлық тәркіленген заттарға сот-химиялық және баллистикалық сараптамалар тағайындалды. Қазіргі уақытта есірткі заттарының шығу көзін анықтауға бағытталған тергеу амалдары жүргізілуде.
Батыс Қазақстан облысы Полиция департаменті «Заң және тәртіп» қағидасы аясында заң бұзушылықтарды анықтау, есірткі қылмыстарының алдын алу және қарудың заңсыз айналымын әшкерелеу бойынша жүйелі жұмысын жалғастыруда.
