Жыл басынан бері 14 бала терезеден құлап кеткен. Бұл жайлы Бала құқықтарын қорғау комитетінің басшысы Насымжан Оспанова әлеуметтік желіде хабарлады.
Фото: pixabay.com
Оның айтуынша, жыл сайын биік үйлердің терезесінен құлап түскен балалар саны өсіп келеді.
Мәселен 2023 жылы — 59 қайғылы оқиға, ал 2024 жылдың 4 айында − 14 жағдай болған.
Бұл қорқынышты сандар — құр статистика емес. Әр оқиғаның артына үңілетін болсақ алдын алуға болатын шынайы трагедия жатыр.
«Біз сізден терезеге арнайы бұғаттағыш орнатуды сұраймыз. Қарапайым ережелерді орындау баланың терезеден түсуінің алдын алуға, оның денсаулығы мен өмірін сақтауға көмектеседі. Үйіңіздің терезелері сенімді жабылғанына және баланың қолы жетпейтініне көз жеткізіңіз. Сондай-ақ, балаңызды ешқашан қараусыз қалдырмаңыз. Бір сәттік немқұрайлық үлкен қасіретке айналуы мүмкін. Балаларымыздың қуанышты күлкісі мен алаңсыз балалық шағы үшін аса мұқият және қырағы болуымыз керек. Ата-аналар, балаларыңызға қамқор болыңыздар! Әр бала бақытты және қауіпсіз балалық шаққа лайық екенін есте ұстаған жөн» деп еске салады Насымжан Оспанова.
Дереккөз: ҚазАқпарат
