Биыл БҚО-да 11 ауылдық медициналық объект ашылды. Оның төртеуі дәрігерлік амбулатория, жетеуі фельдшерлік-акушерлік пункт. Бұл туралы денсаулық сақтау министрлігі хабарлады.
Ел президенті Қасым-Жомарт Тоқаевтың тапсырмасы бойынша "Ауылдық денсаулық сақтауды жаңғырту" ұлттық жобасы шеңберінде өңірде 50 медициналық объекті салу жоспарланған. Бүгінгі таңда тапсыруға жоспарланған 12 медициналық объектінің 5-і пайдалануға берілді.
Батыс Қазақстан облысы Теректі ауданының Сарыөмір ауылында қазан айында жаңа дәрігерлік амбулатория ашылды. Медициналық мекеменің ғимараты пилоттық жоба шеңберінде салынған.
Дәрігерлік амбулаторияның өткізу қабілеті күніне 35 адамға дейін, заманауи медициналық жабдықтармен жабдықталған және ауылдың 22 адамын жұмысмен қамтып отыр. Дәрігерлік амбулаторияда жалпы практика дәрігері кабинеттері, емшара, физиотерапиялық, стоматологиялық кабинеттер, акушер-гинеколог кабинеті, зертханалар, дәріхана, дені сау бала бөлмесі және тағы басқасы бар.
Екінші дәрігерлік амбулатория БҚО Бәйтерек ауданының Асан кентінде пайдалануға берілді. Онда 2 мыңға жуық тұрғынға қызмет көрсетіледі.
Амбулатория орталықтандырылған сумен, автономды жылыту және газбен қамтамасыз етілген. Ол сондай-ақ заманауи жабдықтар, соның ішінде қауіпсіздік камералары, кеңсе жабдықтары, жиһаздар және медициналық қондырғылармен жабдықталған. Жаңа амбулатория халыққа көрсетілетін медициналық көмектің сапасын арттыруға мүмкіндік береді.
Сонымен қатар Новенький кентінде, Пятимар және Қызылоба ауылдарында жаңа медициналық объектілер ашылды.
