Облыс әкімінің орынбасары Мирас Мүлкәйдің төрағалығымен тұрғын үй құрылысына үлестік қатысу және апатты үй иелерінің мәселелері жөніндегі ведомствоаралық комиссияның отырысы өтті. Күн тәртібінде Черекаев көшесі 2/6 мекенжайындағы сақалды құрылыс мәселесі қаралды.
Жиында облыстық мемлекеттік сәулет-құрылыс бақылауы басқармасының басшысы баяндама жасады. Әлібек Антазиевтің сөзінше, мердігер компания мемлекеттік-жекешелік әріптестік бағдарламасы аясында апатты үйдің орнына жаңа көпқабатты нысан салуды жоспарлаған. Осы мақсатта пәтер иелері мен үлескерлерді тарта отырып тиісті шарттар жасалған. Алайда құрылыс жұмыстары созылып, аяқсыз қалған.
Мәселемен жіті танысқан облыс әкімінің орынбасары апатты үй иелерінің құжаттарын реттеп, оларды баспанамен қамту және тоқтап қалған құрылысты жандандыру үшін жаңа инвестор тарту бойынша жауаптыларға нақты тапсырмалар жүктеді.
