Батыс Қазақстан облысында биыл бастапқы үш айда 135 өрт оқиғасы тіркеліп, тілсіз жаудан 1 адам қаза тапты.
Өңірлік коммуникациялар қызметі алаңында өткен брифингіде БҚО ТЖ департаменті мемлекеттік өрт бақылау басқармасының басшысы Мереке Жұмағалиев өрт кезінде 1 адам түрлі дәрежедегі дене жарақатын алғанын айтты. Сондай-ақ ол өрттен келген шығын 21 млн 280 мың теңгеден асқанын атап өтті.
Былтыр осы кезеңмен салыстырғанда, өрт саны 2,8 пайызға (139-дан 135-ке), жарақат алғандар 4 дерекке (5-тен 1-ге) азайған. Тұрғын үй секторында 70 өрт болып, 2024 жылғыдан (76) 7,9 пайызға кеміді.
— Экология және табиғи ресурстар министрлігінің бұйрығына сәйкес облыс аумағындағы мемлекеттік орман қорының жерлерінде өрттің қауіпті маусымы 14 сәуірден басталады. Алайда бүгінге дейін өңірде далада аумағы 147 гектарды қамтыған 13 жану оқиғасы болды. Департамент жергілікті атқарушы және мүдделі мемлекеттік органдармен бірлесіп алдағы қауіпті мерзімде өрттердің алдын алуға бағытталған іс-шаралар кешенін жүргізіп жатыр, - деді М.Жұмағалиев.
Оның айтуынша, департамент жасағында 186 техника бар. Оған қосымша 9 техника жеке құрамды өрт орнына жедел жеткізеді. Өрт сөндіруге тартылған күштермен радиобайланыс орнату үшін командалық-штабтық машина пайдаланылады. Ол барлық ірі табиғи өртке тартылады.
Облыста 182 елді мекенде жергілікті атқарушы органдар құрған 37 өрт сөндіру бекеті болса, соның төртеуі жыл бойына, қалғаны маусымдық қызмет атқарады.
— Рейдтік іс-шараларды өткізу мақсатында облыс бойынша құрамында 84 адам бар 15 мобильді топ құрылды. Күні бүгін 22 рейд өткізіліп, өрт қауіпсіздігі талаптарын бұзған 28 адам 589 800 теңге көлемінде әкімшілік жауапкершілікке тартылды, - деді БҚО ТЖ департаменті мемлекеттік өрт бақылау басқармасының басшысы.
Дереккөз: ҚазАқпарат
