Қазақстан Республикасының мемлекеттік қызметі қоғам өмірінде ерекше рөл атқарады. Қоғам мемлекеттік қызметшілер өз міндеттері мен функцияларын заңдарға сәйкес барлық адал ниетімен құзыретті және тиімді түрде орындайды деп есептейді.
Бұл ретте, әрбір мемлекеттік қызметке алғаш келген мемлекеттік қызметші еліміздің Конституциясы мен заңдарын сақтауға, халқына адал да білікті қызмет етуге ант береді.
ҚР Мемлекеттік қызмет істері агенттігінің Батыс қазақстан облысы бойынша департаменттің бастамасымен «25 қазан – Республика күні» Ұлттық мерекесі қарсаңында мемлекеттік әкімшілік қызметке алғаш қабылданған мемлекеттік қызметшілердің салтанатты түрде ант қабылдау рәсімі ұйымдастырылды.
Егемендігімізді айғақтайтын еліміздің ең басты мерекесінің құрметіне орай өткізілген салтанатты жиынның ашылуында мемлекеттік әнұран орындалып, мемлекеттік қызметке алғаш кірген Бөкей ордасы, Бөрлі, Жәнібек ауданының бірқатар мемлекеттік қызметшілері салтанатты түрде ант қабылдады.
Іс-шара барысында Департамент басшысы М.Байсалов Республика күнімен барша мемлекеттік қызметшілерді құттықтап, ант қабылдаған мемлекеттік қызметшілердің еңбек жолына сәттілік пен жемісті еңбек тіледі.
Сонымен қатар, мемлекеттік қызмет саласының ардагері Ж.Ихсанова жас қызметшілерді атаулы күнмен құттықтап, берген анттарына берік болуды атап өтті. Облыс әкімі аппаратының Әдеп жөніндегі уәкілі А.Хайруллина мемлекеттік қызметшінің әдеп нормаларын сақтауы туралы ескертті.
ҚР Мемлекеттік қызмет істері агенттігінің БҚО бойынша департаментінің баспасөз қызметі
