Бүгін облыстық төтенше жағдайлар департаментінде Тәуелсіздік күніне орай салтанатты жиын өтті. Департамент бастығы, полковник Ернұр Өтегенов ұжымды мерекемен құттықтап, төтенше жағдайлар министрінің бұйрығымен қызметтік міндеттерін адал атқарғаны, қызметте жоғары нәтижелерге қол жеткізгені үшін мерзімінен бұрын атақтар табыстап, құтқарушылар мен өрт сөндірушілерді грамоталар және алғысхаттармен марапаттады. Бұл туралы БҚО ТЖД-ның баспасөз қызметі хабарлады.
Азаматтық қорғау подполковнигі арнаулы атағымен екі қызметкер, ҚР Төтенше жағдайлар министрлігінің Құрмет грамотасымен екі қызметкер, ҚР Төтенше жағдайлар министрінің алғысхатымен үш қызметкер марапатталды.
Бір құтқарушыға ҚР Төтенше жағдайлар министрінің алғысы жарияланды. Сонымен қатар үш қызметкерге «Мінсіз қызметі үшін» медалі табыс етілді.
Жиын барысында жаз мезгілінде суға батып бара жатқан адамдарды құтқарғандары үшін ҚР ТЖ министрінің бұйрығымен «Суға батқандарды құтқарғаны үшін» медалімен Данил Ягузов, Артур Әмірғалиев, Бек Нұғмановтар марапатталды.
Сонымен бірге Андрей Храпонов пен Владислав Рыжков департамент бастығының алғысхатымен марапатталды, кейін олар министрдің «Суға батқандарды құтқарғаны үшін» медалімен марапатталатын болады.
Салтанатты жиын концерттік бағдарламамен жалғасын тапты.
zhaikpress.kz
