«Nur Otan» партиясы ғимаратында «Birgemiz» жалпыұлттық акциясына белсенді қатысқан волонтерлар марапатталды. Оларға Тұңғыш Президент Нұрсұлтан Назарбаевтың өзі қол қойған алғысхаттар табыс етілді.
-Төтенше жағдай кезінде бес мыңнан астам «Jas Otan»-дық волонтерлық жұмыс жасады. Олар демалыссыз еңбек етіп, мұқтаж адамдарға көмек көрсетті. Нағыз патриоттардың, жауапкершілігі мол жас көшбасшылардың жаңа буыны қалыптасқаны қуантады. Олардың ең белсенділеріне арналған алғысхаттарға қол қойдым, - деген болатын Нұрсұлтан Назарбаев.
Салтанатты шара барысында облыс әкімі Ғали Есқалиев өңір волонтерлары 25 мыңға жуық отбасыға жалпы соммасы 1,2 млрд.теңгенің көмегін көрсеткенін атап өтті. Оның айтуынша, пандемия кесірінен жұмыстар тоқтап, көп адам кіріс көзінсіз қалған шақта жергілікті кәсіпкерлер мен ауқатты азаматтар да белсенділік танытып, 90 миллионға жуық қаржы жинап, мақтаж азаматтарға қолдау білдірген. Бұдан бөлек облыс әкімі Түркістан облысының Мақтаарал ауданында орын алған су тасқынынан зардап шеккен отандастарымызға да 30 тоннадан астам гуманитарлық көмек көрсеткен белсенді азаматтарға да алғысын жеткізді.
-2019 жылды Елбасымыз Жастар жылы деп атаса, Мемлекет басшысы Қасым-Жомарт Тоқаев 2020 жылды Волонтерлар жылы деп жариялауы символдық мәнге ие болды. Волонтерлар өздерінің отаншылдығы мен азаматтығын және жанашырлығын таныта отырып, еліміздің жастарына үлгі көрсетті. Жедел әрі үйлесімді жұмысы үшін барша партияластарымыз бен "жасотандықтарға" шынайы ризашылығымды білдіремін. Елбасының үндеуіне қолдау білдірген барша меценаттарға да алғыс айтамын,- деді облыс әкімі кездесу барысында.
«Birgemiz» жалпыұлттық акциясына белсенді атсалысып, Елбасы алғысхатына үш мыңнан астам қазақстандық ие болған болса, өңіріміздің 104 волонтеры Тұңғыш Президентіміздің марапатына ие болды. Олардың арасында самбодан әлем чемпионы, халықаралық дәрежедегі спорт шебері Нұрбол Серіков, айтыскер ақындар Эльдар Ықсанов пен Талғат Мықи, ұстаздар мен белсенді азаматтар бар.
-Біздің волонтерлар мұқтаж жандарға азық-түлік қоржынын жеткізумен шектелген жоқ. Көптеген азаматтарға электронды қолтаңба алуға және әлеуметтік төлемдерді рәсімдеуге, Елбасының «Birgemiz» қоры арқылы бөлінген қаражатты қалай алуға болатыны жайында да кеңестер беріп, әлеуметтік желілер арқылы тікелей эфирлер жүргізді. Сонымен қатар азық-түлік жинау жұмыстарын жүргізуге де үлкен көмек көретті,-дейді «Nur Otan» партиясы жанындағы «Jas Otan» жастар қанатының Батыс Қазақстан облыстық филиалының жетекшісі Нұрғали Жолдасқалиев.
Кездесуде ақын Эльдар Ықсанов ел үшін еңбек еткен еріктілердің еңбегін ескерген Елбасы мен волонтерлардың тынымсыз тірлігіне қолдау білдірген барша азаматтарға ризашылығын білдірді.
-Төтенше жағдай кезінде көптеген отандастарымыз қиын жағдайға қалғанын көрдім. Өңір самбошылары бірігіп, аз қамтылған, көпбалалы отбасылар мен жалғызбасты аналарға көмек көрсеттік. «Biz Birgemiz» секілді ауқымды акцияға қатысқаныма қуаныштымын. Еңбегімізді елеген Елбасымызға алғысымыз шексіз,-дейді әсерімен бөліскен волонтер, Нұрбол Серіков.
Шара соңында Ғали Есқалиев еріктілердің еңбегі зор екенін айтып, індетпен күрес әлі де жалғасатынын, сақтық шараларын орындауға шақырды.
Түгелбай Бисен
zhaikpress.kz
