1 желтоқсан – Дүниежүзілік ЖИТС-ке (жұқтырылған иммун тапшылығы синдромы) қарсы күрес күні. Бұл күні әлемнің түкпір-түкпірінде АИТВ (адамның иммун тапшылығы вирусы) инфекциясымен өмір сүріп жатқан адамдарға қолдау көрсету мақсатында түрлі шаралар өткізіледі.
Өңірлік коммуникациялар алаңында өткен кезекті баспасөз мәслихатында баяндама жасаған облыстық АИТВ инфекциясының алдын алу орталығының директоры Ақтілек Өмірбаев пен орталық директорының орынбасары Алмагүл Мантакова Дүниежүзілік ЖИТС-ке қарсы күрес күніне арналған профилактикалық іс-шаралардың онкүндігі туралы ақпарат берді.
– Биыл өңірімізде АИТВ инфекциясы 1 119 адамда тіркелген. Облыс бойынша АИТВ-ның таралу көрсеткіші 100 мың адамға шаққанда 161,4 науқасты құрайды (ерлер – 66,8%, әйелдер – 33,2%). Облыс тұрғындары арасында АИТВ инфекциясының көптеп таралуы Орал қаласында анықталған, ал ауылдық жерлерде ауру деңгейі айтарлықтай төмен. Дегенмен де өңір аудандарында аурушаңдық деңгейі Бөрліде – 13,2%, Бәйтеректе – 5,7%, Ақжайық пен Теректі аудандарында – 3,8%, Бөкей ордасы мен Казталов аудандарында 1,9%-ды құрайды. АИТВ көбіне гетеросексуалдық және гомосексуалдық жыныстық қатынас, кейін инъекциялық есірткі қолдану кезінде парентеральді жолмен жұғады, – деді Ақтілек Армандаұлы.
Дүниежүзілік ЖИТС-ке қарсы күрес күні аясында облыстық АИТВ инфекциясының алдын алу орталығы бірқатар іс-шара өткізуді жоспарлап отыр. Осыған орай бұқаралық ақпарат құралдарында кеңінен ақпарат таратылып, қоғамдық орындарда акциялар өткізілмек, сондай-ақ баспасөз конференциялары мен бейнеконференциялар да ұйымдастырылмақ. Осы арқылы АИТВ-ның алдын алу және жұртшылықты ақпараттандырып, қоғамдық түсінікті арттыру көзделеді.
– АИТВ-ға қарсы шаралар адамның құқықтарын қорғауға негізделгенде ғана нәтижелі болады. Қоғамда АИТВ-мен өмір сүретін адамдарға деген стигма мен кемсітушілік азайып, науқастар емделіп, профилактикалық шараларға ашық қол жеткізе алады. Біздің облыстың 90%-дан аса тұрғыны АИТВ-ға тестілеуден өткен. Бұл профилактикалық бағдарламаларының тиімділігін көрсетеді. АИТВ-ның алдын алудағы тағы бір маңызды аспект – жүкті әйелдерге арналған профилактика. Биыл 100% жүкті әйел АИТВ-ға тестілеуден өтті. Қорыта айтқанда, АИТВ-ның алдын алу шаралары мен адам құқықтарын қорғау бір-бірімен тығыз байланысты. Тек осы арқылы біз АИТВ-мен өмір сүріп жатқан адамдарға қолдау көрсетіп, инфекция таралуының алдын аламыз, – деді Алмагүл Ақжұманқызы.
Аружан Аманжол
zhaikpress.kz
