Биылғы жыл қазақтың көрнекті ақыны, Батыс Қазақстан облысы Ақжайық ауданының тумасы Жұбан Молдағалиевтің 100 жылдық мерейтойы екендігі белгілі.
Облыс әкімдігі мен облыстық мәдениет басқармасы 31 наурызда жиын өткізіп, облыста Жұбан жылы деп жарияланып, ауқымды шаралар Жұбан Молдағалиев атындағы облыстық ғылыми-әмбебап кітапханасынан бастау алды.
- Біз Жұбанды тек қана Оралдың ғана емес, қазақтың көрнекті ақыны деп дәріптейміз. Бүгінгі таңда Жұбан мұрасын ұлықтау мақсатында облыста көлемді шаралар жүзеге асырылып отыр.
Оның бірі Ж.Молдағалиевке арналған энциклопедия шығару еді. Алла бұйыртса, энциклопедия қыркүйек айының басында жарыққа шықпақ. Бұл жұмысқа көптеген ақын-жазушылар, ғалымдар, зиялы қауым өкілдері үлкен үлес қосты. Әсіресе, Ж.Молдағалиев атындағы облыстық ғылыми-әмбебап кітапханасының ұжымына алғысымыз шексіз.
Сонымен қатар Оралдағы қазіргі тұрған Жұбан Молдағалиевтің ескерткішінің орнына еңселі ескерткіш орнайды деп күтілуде.
Бұның сыртында Хадиша Бқкеева атындағы облыстық қазақ драма театры Жұбан ақынға арналған премьера дайындау үстінде.
Айта кету керек, облыс аумағындағы кітапханаларда ақын шығармашылығына арналған ірі көлемдегі іс-шаралар өтті. Қазіргі таңда пандемияға байланысты онлайн түрде жалғасуда.
Осыған дейін облыстық білім басқармасы мұғалімдер арасында Жұбан өлеңдерінен көркемсөз оқу шеберлерінің байқауын өткізді.
Алдымызда Жұбан Молдағалиевтің 100 жылдығы мен Қадыр Мырза Әлидің 85 жылдығына арналған аламан айтыс тұр. Ал «Ақжайық» телеарнасы ақынның өмірі мен шығармашылығына арналған бейнекөрсетілім түсірмек ниетте.
Сонымен қатар ақынның туған жері Ақжайық ауданында Жұбан Молдағалиевке арналған іс-шаралар үздіксіз жүріп жатыр, - дейді жұбантанушы, ақын-ұстаз, ҚР білім беру ісінің үздігі Үзілдік Елеубайқызы.
Ертай Бимұханов
zhaikpress.kz
