Бүгін облыстық сайлау комиссиясының төрағасы Ғайса Қапақов бұқаралық ақпарат құралдары өкілдерін биыл 10 қаңтарда өткен ҚР Мәжілісінің және мәслихаттары депутаттары сайлауының қорытындысымен таныстырды.
–Сайлау өз мәресіне жетті. Саяси додаға облыс бойынша 283269 адам қатысты. Бұл сайлаушылардың 62,4 пайызы деген сөз. Содан сайлауда 273998 адам дауыс берді. Сайлаушылардың 222616-ы, яғни 81,25 пайызы «Nur Otan» партиясын, 22669-ы, яғни 8,27 пайызы «Ауыл» партиясын, 22967-і, яғни 8,38 пайызы «Ақжол» партиясын қолдаса, «Адал» партиясын 5746 сайлаушы жақтап, яғни 2,1 пайыз дауыс жинады. Саяси тартысқа қатысқан барлық сайлаушыларға алғысымызды білдіреміз. Ауа райының қолайсыздығына қарамастан басым көпшілік сайлаушылар саяси науқанға белсене атсалысты. Батыс Қазақстан облыстық сайлау комиссиясы «Nur Otan» партиясын, «Ауыл» партиясын, «Ақжол» демократиялық партиясын және «Адал» саяси партиясын тіркеді. Партияларға партиялық квота белгіленді. Саяси партияларға саяси партиялардың жіберген квотасы бойынша «Nur Otan», «Ауыл», «Ақжол», яғни осы үш саяси партияға депутаттық мандат бөлінді. Сөйтіп «Nur Otan» партиясынан 25 адамға, «Ауыл» партиясынан 3 адамға және «Ақжол» партиясынан 3 адамға облыстық мәслихаттың депутаттығына мандат белгіленді. Барлық деңгейдегі мәслихаттардың депутаттығына облыс бойынша 190 депутат депутаттық мандат алады. Әр партия бүгіннен бастап, саяси бюро өткізіп, облыстық сайлау комиссиясына депутаттардың аты-жөндерін береді. Біз олардың тізімдерін жариялап, әрбір депутатқа куәлік, төсбелгі әзірлейміз. Облыс бойынша сайлау ұйымшылдықпен өтті. Бақылаушылар саяси доданың жоғары деңгейде өткенін мәлім етті. Еуропадағы қауіпсіздік және ынтымақтастық ұйымынан(ОБСЕ) және ТМД елдерінен келген халықаралық бақылаушылар тарапынан айтарлықтай ескертпелер болған жоқ. Орал қаласында сайлаушылардың 40 пайызы дауыс берсе, аудандардың ішінде сайлаушылардың 95 пайызы сайлауға қатысып, дауыс бергендері бар,–деді Ғайса Хамидоллаұлы.
Журналистермен болған брифингте облыстық сайлау комиссиясы төрағасының орынбасары Вячеслав Иночкин ҚР Мәжілісінің және мәслихаттары депутаттарының сайлауы өткізілген күні жаһанды жайлаған дерттің алдын алу мақсатында барлық санитарлық талаптардың сақталғанын, сайлау учаскелерінде 2429 адамның болғанын, соның ішінде 568 сенімді өкіл, 1333 байқаушының 478-і қоғамдық бірлестіктерден, 31-і бұқаралық ақпарат құралдары өкілдері екендігін баян етті. –Сонымен қатар сайлау учаскелеріне 14 халықаралық байқаушы келсе, соның ішінде Еуропадағы қауіпсіздік және ынтымақтастық ұйымынан (ОБСЕ) екі және ТМД елдерінен 12 байқаушы сайлау барысын қадағалады. Сайлау учаскелерінде мүмкіндігі шектеулі сайлаушыларға барлық жағдай жасалып, облыстың 5 елді мекенінде инватакси қызметі пайдаланылды. Науқан кезінде 40 сурдоаудармашы маман жұмыс істеді,–деді ол.
Нұрымбек Жапақов,
zhaikpress.kz
