Батыс Қазақстан облысының спорт тарихында жаңа есім шығып келеді. Бәйтерек ауданының тумасы Сұлтан Шарипов кәсіпқой бокстан Қазақстан чемпионы атанып, өңір мерейін үстем етті. Біз бүгін жас чемпионның спорттық жолы мен жетістіктеріне тоқталуды жөн көрдік.
Сұлтан Шарипов 2000 жылы қазіргі Бәйтерек ауданының орталығы Переметный ауылында дүниеге келген. Оның үлкен спортқа деген қызығушылығы 11 жасында басталды. Сол кезде алғашқы бапкері Руслан Сариевтің қарамағына келген Сұлтан бүгінге дейін сол ұстазымен бірге жаттығып, биік белестерді бағындырып келеді. Бұл спорттағы сабақтастық пен адалдықтың жарқын үлгісі болса керек.
Әуесқой рингтен халықаралық деңгейге дейін
Сұлтан кәсіпқой боксқа келмес бұрын әуесқой рингте үлкен тәжірибе жинақтады. Ол 100-ден астам кездесу өткізіп, Батыс Қазақстан облысында өткен жарыстардың барлығында дерлік топ жарды. Оның жеңісті жолы тек өңірмен шектелмей, Ақтау, Ақтөбе және өзге де ірі қалалардағы республикалық турнирлерде жалғасты.
Сонымен қатар, Шарипов халықаралық аренада да ел намысын абыроймен қорғады. Ресейдің Самара, Саратов қалаларында және Татарстан Республикасында өткен додаларда қарсыластарын қапы қалдырып, қазақ бокс мектебінің мықтылығын дәлелдеді. Айта кетерлігі, Сұлтан тек бокспен шектелмей, кикбокстан да облыс чемпионы атағын иеленген әмбебап спортшы.
«Top Dog» және жалаң жұдырық айқасы
Спортшының мансабындағы ерекше кезең жалаң жұдырық айқастары (кулачные бои). Тәуекелге бел буған бозбала әуесқой бокс рингін «Top Dog» лигасының шөппен қоршалған алаңына алмастырды. Бұл бағытта ол 7 кездесу өткізіп, оның 5-інде айқын жеңіске жетті. Мұндай жекпе-жектер оның мінезін шыңдап, төзімділігін арттырды.
Тарихи жеңіс: Кәсіпқой бокс чемпионы
Сұлтан Шариповтың тынымсыз еңбегі мен темірдей тәртібі өз жемісін берді. Кәсіпқой бокс рингінде өткізген төрт жекпе-жегінің нәтижесінде ол 61 келі салмақ дәрежесінде Қазақстан чемпионы белдігін жеңіп алды.
Маңызды факт: Сұлтан Шарипов кәсіпқой бокстан ел чемпионы атанған тұңғыш батысқазақстандық спортшы. Бұл жеңіс облыс спортшылары үшін жаңа белестердің ашылуына жол салды.
Бүгінгі қызметі мен болашаққа жоспар
Қазіргі таңда Сұлтан тек өз мансабын ғана ойламай, кейінгі толқынға үлгі болуды көздейді. Ол туған жеріндегі «Бәйтерек» спорт клубында әдіскер және бокс бапкері болып қызмет атқарады. Өзінің жинаған тәжірибесін ауыл балаларына үйретіп, болашақ чемпиондарды тәрбиелеуге атсалысып жүр.
Біз жас чемпионның алдағы уақытта әлемдік деңгейдегі белдіктерді сарапқа салып, көк туымызды халықаралық ареналарда желбіретуіне тілектестік білдіреміз.
Арал Болпышұлы
«Орал өңірі»
