Қар шығаруға құқық қорғау, денсаулық сақтау, төтенше жағдай саласының мамандары, жастар, қаланың белсенді тұрғындары, еріктілер, кәсіпкерлер мен мемлекеттік қызметкерлер атсалысты.
Орал қаласы әкімдігі баспасөз қызметінің хабарлауынша, жалпы акция аясында 7,5 шақырым арық жүйесі тазартылып, жұмысқа 50-ден астам техника жұмылдырылған. Ал қала сыртына барлығы 747 текше метр қар шығарылған.
Акцияның басты мақсаты — көктемгі су басу қаупінің алдын алып, абаттандыруға дайындық жүргізу еді. Солардың бірі — су басу қаупі бар Зашаған кентінің Сарытау шағынауданындағы арық жүйелерін тазарту. Шараға қала тұрғындары, кәсіпкерлік нысандардың ұжымы, жастар мен мемлекеттік қызметкерлер, партия мүшелерінен тұратын 60-тан астам адам қатысты. Қар тазалауға 8 арнайы техника жұмылдырылған. Көпшілік қар шығару акциясына жастар да белсенді қатысқан.
Олар қаланың солтүстік-шығыс бөлігіндегі Жұлдыз шағынауданы көшелерінің арық жүйелерін қардан тазартып, қала тазалығына үлес қосты. Бұдан бөлек, өзге де жастар қаладағы ардагерлердің, жалғызбасты қариялардың аулаларын қардан тазалауға көмектескен.
zhaikpress.kz
