Еділ Жаңбыршин атап өткендей, халықтың сабырлығы мен ауызбіршілігінің, Президентіміз Қасым-Жомарт Тоқаевтың табандылығы, қайсарлығы және республикаға, Конституциялық құрылымға қарумен қарсы шыққан содырлар мен бандиттерді жою жөніндегі жауапты шешімінің арқасында мемлекеттің егемендігі және тұрақтылығы сақталып қалды.
Бұл жағдай кездейсоқ болған жоқ. Елімізде көптен бері қордаланып, әділетсіздік пен жемқорлықтың кесірінен шешімін таппаған әлеуметтік-экономикалық мәселелер оқиғаның тұтануына себепші болды. Қаңтар оқиғасы бәріміз үшін үлкен сабақ болуы керек. Оның алғышарттары – қоғам мен биліктің шынайы тазаруы, ақиқаттың ашық айтылуы, қателіктердің мойындалуы, мемлекеттік аппарат пен құрылымдардың олигополия өкілдері мен жемқорлардан тазартылуы. Мұны бүгін қоғам белсенді талқылап және оны Мемлекет басшысы батыл түрде іске асыра бастады, - деп айтты депутат Мәжілісте.
baq.kz
