Алматыда Халықаралық дзюдо федерациясы (IJF) мамандарының қатысуымен дзюдо бойынша құрлықтық және халықаралық санаттағы төрешілерге арналған семинар-емтихан аяқталды. Бұл туралы olympic.kz жазды.
Нәтижесінде қазақстандық төреші Самат Сапишевке IJF International – халықаралық деңгейдегі төреші, Асхат Жіткеев пен Николай Иванов IJF Continental – құрлықтық деңгейдегі төреші атағы берілді.
Семинардың алғашқы күндерінде теориялық бөлімді аяқтаған төрешілерр жазбаша және ауызша емтихан тапсырғанын атап өткен жөн. Мамандар Алматыдағы Бекет Махмұтовты еске алуға арналған кадеттер мен жастар арасындағы дзюдодан Азия Кубогының жарыс алаңында тәжірибелік білімдерін көрсетті.
19 судья IJF төрешілерінің құрлықтық және 21 халықаралық санатын алды және растайтын сертификаттармен марапатталды. Семинарға барлығы 18 елден 42 төреші қатысты.
Емтихандарды Халықаралық дзюдо федерациясының (IJF) төрешілер комиссиясының басшылары Армен Багдасаров пен Даниэль Ласкау, сондай-ақ Азия дзюдо одағының төрешілер директоры Мун Вон Бое қабылдады.
Халықаралық төреші атағын алған мамандар Гран-приді, Үлкен дулыға турнирлерін, құрлықтық және әлемдік чемпионаттарды, Олимпиада ойындарын бағалауға құқылы.
Семинар елімізде екінші рет өткізілуде. Қазақстанның дзюдо федерациясы IJF-пен бірлесіп жыл сайын осындай халықаралық деңгейдегі іс-шараларды өткізуді жоспарлап отыр.
