Жәнібек ауданында электр қуатын өндіретін станса салынады. Облыс әкімі Нариман Төреғалиев пен «Green Spark Limited» ЖШС өкілі Marco Cactagini мырза келісімшартқа қол қойды.
Өңірдегі Жәнібек және Бөкей ордасы аудандарының электр қуатын Ресей Федерациясынан алатыны белгілі. Қос ауданның халқы 5 мегаватт электр қуатын тұтынады. Егер станса іске қосылса, ең алдымен, өңірдегі энергетикалық тұрғыдан дербестікті қамтамасыз етпек. Италиялық инвестормен келіссөз барысында өңір басшысы Нариман Төреғалиұлы бұл жобаның екі аудандағы электр қуатының бағасын арзандатуға, қарайған тұтынушыны жергілікті электр қуатымен қамтуға мүмкіндік беретінін атап өтті.
– Біздің компания халықаралық деңгейде жұмыс істейді. Италия мен Сербияда, тіпті Африка құрлығында да қолға алып, жүзеге асырып жатқан жобаларымыз бар. Алайда негізгі қызметімізді Бөрлі ауданындағы Ақсай қаласында бастадық. Біздің басты тұтынушымыз – Қарашығанақ кен орны. Жобаны қауіпсіз әрі тез жүзеге асыруға барымызды саламыз, – деді Marco Cactagini мырза.
Облыстық энергетика және тұрғын үй-коммуналдық шаруашылығы басқармасының басшысы Мирас Мүлкайдың айтуынша, стансаны іске қосу үшін Жәнібек ауданының Өнеге ауылы аумағынан 20 гектар жер белгіленген. Бұл гибридті станса болады. Яғни жартылай күн сәулесінен қуат алады, жартылай газбен де жұмыс істейді. Оны жеке инвестор қаржыландырады. Ал жергілікті атқарушы құрылым осы стансадан өндірілетін электр энергиясын толық сатып алуға кепілдік береді. Жоба екі жыл ішінде жүзеге аспақ.
– Біз үшін өте маңызды құжатқа қол қойылды. Себебі Ресейдің қос облысымен шектесетін ауданымыз көрші елден келетін электр қуатын тұтынып отыр. Қазір ауданда 4300 абонент бар, – деді Жәнібек ауданының әкімі Тимур Шиниязов.
Ясипа Рахимқызы,
«Орал өңірі»
