Бала асырап алу жөніндегі ұлттық агенттік – «АНА ҮЙІ» қоғамдық қоры бағыттарының бірі. Агенттіктің мақсаты - Қазақстандық қоғамда қабылдаушы отбасыларды кәсіби даярлау, сүйемелдеу және бала асырап алу мәдениетін дамыту.
Қазақстанның 20 қаласында кеңес беру кабинеттері жұмыс істейді.
Қор мамандары өз отбасыларына мекемеде тәрбиеленіп жатқан балаларды қабылдағысы келетін азаматтарға консультациялық көмек көрсетеді. Барлық сұрақтар бойынша 1422 колл-орталығы жұмыс атқарады.
Психологтар Қабылдаушы ата-аналар мектептерінде әлеуетті асырап алушыларды дайындайды. Олар жас психологиясы туралы, қабылданған баламен байланыс орнату және бүкіл отбасының жаңа өзгерістерге жұмсақ бейімделуі жайлы құнды білім алады.
Осындай жауапты қадамға бел буған азаматтардың барлығы Қабылдаушы ата-аналар мектебінен өтуі қажет.
Мектептің мақсаты – ата-аналарды мекемеден баланы қабылдауға дайындау, барлық қажетті ақпаратты беру, дағдыларды үйрету, маңызды сұрақтарға жауап табуға көмектесу, өздерінің мүмкіндіктері мен шектеулерін түсіну, қабылдаушы ата-ана болуға дайындығын түсіну.
Үміткерлер қабылданған баланың ерекшеліктері мен қажеттіліктері туралы түсінік алады; қабылдаушы ата-ана ретінде өздерінің қабілеттері мен мүмкіндіктерін түсінеді; отбасына қандай баланы қабылдай алатынын және қандай қабылдау түрі қолайлы екенін түсінеді.
Балаларды орналастыру саласында кешенді тәсіл өте маңызды. Үміткерді оқытып қана қоймай, оған қанша қажет болса, сонша сүйемелдеу жұмысы көрсетіледі. Сондықтан біздің жұмысымызда міндетті бағыт – қабылдаушы отбасыға сүйемелдеу көрсету. Жұмыс тәжірибесінен білетініміз, бала отбасына келгеннен кейін ең қиын кезең - бейімделу басталады. Осы уақытта психолог пен әлеуметтік жұмыс жөніндегі маманның отбасыға кәсіби сүйемелдеу көрсетуі өте маңызды.
Сүйемелдеудің әр түрлі формалары бар - бұл отбасына бару, мамандармен кездесу, психологиялық кеңес беру және тағы басқасы. Сүйемелдеу баланы қайтарудың алдын алу шарасы ретінде қажет.
Отбасында балалар үйінен келген баланың жарақаттары ашыла бастайды. Біздің психологтардың айтуынша, «бал айы» аяқталғаннан кейін, бұл әдетте бір, екі, үш айдан соң барлық отбасыларда үйренісу басталады. Осы кезде қабылдаушы отбасыларға қолдау мен көмек қажет. Біздің психологтар әр отбасына көмектесуге тырысады.
Бүгінгі таңда Бала асырап алу жөніндегі ұлттық агенттіктің көмегімен қазақстандық отбасыларға 1802 бала орналастырылды (бұл цифр үнемі өсіп келеді).
2022 жылдың мамыр айынан бастап пилоттық жоба іске қосылды.
Пилоттық жоба – жетім балалар мен ата-анасының қамқорлығынсыз қалған балаларды, мүмкіндігі шектеулі және даму ерекшеліктері бар балаларды отбасына тәрбиелеуге қабылдауды жоспарлап отырған Қазақстан Республикасының азаматтарын ынталандыруға және қолдауға бағытталған «АНА ҮЙІ» ҚҚ қайырымдылық бастамасы.
Жобаны үш жыл ішінде жүзеге асыру жоспарланып отыр. Жоба аясында қабылдағаннан кейін балаларды оңалтушы дәрігерлердің тексеруінен өткізу, балаларды медициналық оңалтудан және педагогикалық түзетуден өтуі үшін төлем жүргізіледі. Балалардың ота еміне төлем жасайды, қабылдаушы отбасыға консультациялық және ақпараттық көмек көрсетіледі.
«АНА ҮЙІ» қоғамдық қоры
